Ramallahda ekspertlər İsrail hökumətinin işğal altındakı Qərb Sahilində yenidən başlatdığı torpaq qeydiyyatı prosesinin bölgədə faktiki ilhaqın hüquqi əsasını formalaşdırdığını bildirirlər. 1967-ci ildən bəri ilk dəfə olaraq qeydiyyat prosesinin bərpası ilə İsrail ordusuna bağlı Qurumların Fəaliyyətlərinin Koordinasiyası İdarəsi (COGAT) “C” bölgəsində mülkiyyət sənədləşməsini həyata keçirəcək.
Qərara əsasən, rəsmi sənədlərlə mülkiyyətini sübut edə bilməyən torpaqlar “dövlət torpağı” kimi İsrail adına qeydiyyata alınacaq. Fələstin Azadlıq Təşkilatına (FAT) bağlı qurumun hüquq bölməsinin rəhbəri Həsən Bureyce bildirib ki, bu mexanizm, xüsusilə, Qərb Sahilinin təxminən 61 faizini təşkil edən və İsrailin tam nəzarətində olan “C” bölgəsində geniş torpaq sahələrini əhatə edə bilər.
Onun sözlərinə görə, proses yalnız texniki qeydiyyat deyil, torpaqların İsrail dövləti adına rəsmiləşdirilməsi və sonradan yəhudi məskunlaşma vahidlərinə verilməsi mərhələsini əhatə edir. Bureyce bunu “hiyləgər ilhaq” kimi xarakterizə edərək, beynəlxalq hüququn açıq şəkildə pozulduğunu vurğulayıb.
Ekspert 1907-ci il Haaqa Konvensiyasına və BMT Təhlükəsizlik Şurasının 2016-cı ildə qəbul etdiyi 2334 saylı qətnaməsinə istinad edərək, işğalçı gücün mövcud yerli qanunvericiliyi dəyişdirməsinin yolverilməz olduğunu bildirib. Onun fikrincə, “dövlət torpağı” anlayışı hüquqi termindən daha çox, ərazidə faktiki nəzarəti qalıcı etmək üçün siyasi alətə çevrilib.
İsrail hökuməti isə qərarı yaşayış məntəqələrinin inkişafı və inzibati proseslərin tənzimlənməsi kimi təqdim edir. Yerli mediaya görə, məqsəd 2030-cu ilədək “C” bölgəsinin təxminən 15 faizinin mərhələli şəkildə qeydiyyata alınmasıdır.
Fələstin tərəfi və bir sıra beynəlxalq aktorlar isə bu addımı Qərb Sahilinin mərhələli şəkildə ilhaqına zəmin yaradan təşəbbüs kimi qiymətləndirir.
