Ukrayna Prezidenti Volodimir Zelenski “Vivaldi” əməliyyatının başlanmasından indiyədək ölkənin Müdafiə Qüvvələrinin ümumilikdə 176 kvadratkilometr ərazini yenidən nəzarətə götürdüyünü açıqlayıb. Onun sözlərinə görə, əməliyyat nəticəsində Rusiya qüvvələrinin Slovyansk-Kramatorsk aqlomerasiyasının arxa hissəsinə doğru irəliləmək planlarının qarşısı alınıb.
MSNews.az xəbər verir ki, Zelenski sentyabrın 30-da Ukrayna ordusunun 3-cü Ordu Korpusunun komanda məntəqəsinə səfər edərək “Vivaldi” əməliyyatında iştirak edən hərbçilərlə görüşüb. Korpus komandiri Andriy Biletski prezidentə əməliyyatın aralıq nəticələri barədə məlumat verib.
Ukrayna Prezidentinin Ofisinin məlumatına görə, indiyədək əməliyyatın üç mərhələsi həyata keçirilib. Kiyev bildirir ki, bu müddətdə Rusiya qüvvələrinin ölən və yaralananlar daxil olmaqla itkiləri 5 mindən çox olub, daha 250 rusiyalı hərbçi əsir götürülüb.
Zelenski və hərbi komandanlıq görüş zamanı əməliyyatın dördüncü mərhələsi üzrə aktiv döyüş fəaliyyətlərinin planlarını da müzakirə ediblər.
Ukrayna rəhbərliyi eyni zamanda cəbhədə yerüstü robotlaşdırılmış sistemlərin istifadəsini genişləndirməyi planlaşdırır. Zelenskinin sözlərinə görə, “Vivaldi” zamanı belə sistemlərin tətbiqi nəticə verib və məqsəd gələcəkdə ən təhlükəli döyüş tapşırıqlarının mümkün qədər hərbçilər əvəzinə pilotsuz və robotlaşdırılmış vasitələrlə yerinə yetirilməsidir.
Sentyabrın 28-də 3-cü Ordu Korpusu əməliyyatın son mərhələsində Nove, Ridkodub və Katerinivka yaşayış məntəqələrinin ələ keçirildiyini, Karpivka və Novomıxaylivkada isə Ukrayna nəzarətinin bərpa olunduğunu açıqlamışdı. Korpus həmin mərhələdə əlavə 51 km² ərazinin nəzarətə qaytarıldığını bildirmişdi.
“Reuters”in məlumatına görə, “Vivaldi” Donetsk vilayətinin şimalında, Liman istiqamətində Ukraynanın həyata keçirdiyi əks-hücum əməliyyatıdır.
