İsrailin Baş naziri Binyamin Netanyahu sabah Yerusəlimdə Yunanıstan Baş naziri Kİriakos Miçotakis və Cənubi Kipr lideri Nikos Xristodulidis ilə üçtərəfli görüş keçirəcək.
Zirvə enerji, kəşfiyyat və müdafiə əməkdaşlığı gündəmləri ilə planlaşdırılır, lakin əsas müzakirə mövzularından biri Türkiyənin Şərqi Aralıq dənizindəki mövqeyi olacaq.
Netanyahu hər iki liderlə ayrı-ayrı ikitərəfli danışıqlar aparacaq və sonra üç ölkə arasında birgə mətbuat konfransının keçirilməsi planlaşdırılır. Görüşün rəsmi gündəmi enerji, kəşfiyyat və müdafiə sahələrində əlaqələrin dərinləşdirilməsi olsa da, əsas diqqət Şərqi Aralıq dənizində regionun təhlükəsizliyi və Türkiyənin rolu üzərindədir.
Yunan mətbuatına görə, Afina, Nikosia və Tel-Əviv arasında Şərqi Aralıq dənizində ortaq “sürətli müdaxilə gücü” yaradılması ehtimalı müzakirə olunur. Bu plan çərçivəsində təxminən 2 500 hərbçinin daxil olduğu bir qüvvənin qurulması nəzərdə tutulur və bu strukturun Türkiyəyə qarşı potensial müdaxilə gücü kimi formalaşa biləcəyi iddia edilir — baxmayaraq ki, rəsmi qurumlar bu iddiaları rədd ediblər.
Görüşün arxa planında Yunanıstan və Cənubi Kiprin, Türkiyənin “Mavi Vətən” strategiyası ilə regiondakı hərbi gücünü artırması səbəbindən narahatlıq duyduğu ifadə edilir. Həmçinin, bu üçlüyün müdafiə sənayesi və donanma fəaliyyətlərini də gücləndirməyi planlaşdırdığı bildirilir.
Rəsmi Ankara isə bu əməkdaşlığın “təhlükə yaratmadığını”, lakin müəyyən hərbi fəaliyyətlərə qarşı zəruri tədbirlərin görüləcəyini” bildirib. Türkiyə Müdafiə naziri Yaşar Gülər belə tədbirlər üçün hazırlıq getdiyini vurğulayıb.
Regionda gərginliyi artıran bu əməkdaşlıq enerji şəbəkələri (elektrik kabel layihələri), hərbi təlimlər və strateji əməkdaşlıq razılaşmaları ilə də müşayiət olunur ki, bu da uzun müddətdir davam edən Aralıq dənizi geosiyasətini daha da mürəkkəbləşdirir.
