Pakistan, Səudiyyə Ərəbistanı və Türkiyə “Məkkə Birgə Müdafiə Sazişi” çərçivəsində kollektiv müdafiə öhdəliklərinin praktiki icrasına başlamaq və razılaşdırılmış hərbi qüvvə və imkanları Səudiyyə Ərəbistanına sürətlə yerləşdirmək barədə razılığa gəliblər.
MSNews.az xəbər verir ki, qərar oktyabrın 5-də Ər-Riyadda keçirilən Məkkə Müdafiə Alyansının Strateji-Siyasi və Müdafiə Komitəsinin fövqəladə toplantısında qəbul olunub.
Pakistan Xarici İşlər Nazirliyinin birgə bəyanatında bildirilir ki, tərəflər “razılaşdırılmış hərbi qüvvə və imkanların təmin edilməsi və onların Krallıq ərazisinə sürətli yerləşdirilməsi” üçün zəruri tədbirləri dərhal həyata keçirəcəklər. Bu addımlar hər üç ölkənin milli qanunvericiliyinə və əvvəlcədən razılaşdırılmış mexanizmlərə uyğun atılacaq.
Bəyanatda Məkkə və Mədinənin hədəfə alınması cəhdləri, eləcə də Səudiyyə Ərəbistanının şəhərlərinə, mülki və iqtisadi obyektlərinə qarşı davam edən hücumlar kəskin şəkildə pislənilib. Türkiyə və Pakistan Səudiyyə Silahlı Qüvvələrinin bu hücumlara qarşı fəaliyyətini yüksək qiymətləndiriblər.
“Reuters” daha əvvəl yazmışdı ki, avqustun 7-də imzalanan Məkkə Birgə Müdafiə Sazişinə əsasən, üç ölkədən birinə qarşı silahlı hücum hamısına qarşı hücum kimi qəbul edilir. Pakistan rəsmiləri sazişin müdafiə xarakterli olduğunu və konkret bir ölkəyə qarşı yönəlmədiyini bildirirlər.
Oktyabrın 5-də qəbul edilən qərar sazişin indiyədək ən konkret hərbi icra mərhələlərindən biri hesab olunur. “Dawn” da Pakistan və Türkiyənin Səudiyyə Ərəbistanına qüvvə və hərbi imkanlar yerləşdirməyə razılaşdığını yazır.
