ABŞ Prezidenti Donald Tramp Senatın İranla bağlı hərbi səlahiyyətlər qətnaməsinə səs verməsini sərt tənqid edib.
MSNews.az xəbər verir ki, “Fox News” Trampın “Truth Social” hesabında paylaşım etdiyini yazıb. ABŞ Prezidenti bildirib ki, Senatın bu addımı İranla bağlı danışıqlar və təzyiq siyasəti üçün “ən uyğunsuz vaxtda” atılıb.
Tramp paylaşımında İranın təzyiq altında olduğunu, Vaşinqtonun mövqeyinin gücləndiyini və Tehranın razılaşmaya yaxınlaşdığını iddia edib. Onun sözlərinə görə, Senatın səsverməsi İran tərəfinə ABŞ daxilində onun siyasətinə dəstək olmadığı mesajını verə bilər.
“Associated Press” yazır ki, Senat qətnaməni 50-48 səslə qəbul edib. Sənəd Prezidentin Konqresin ayrıca razılığı olmadan İrana qarşı hərbi gücdən istifadə imkanlarını məhdudlaşdırmağa yönəlib.
Qətnaməni demokratlarla birlikdə dörd respublikaçı senator — Syuzan Kollins, Liza Murkovski, Rend Paul və Bill Kassidi dəstəkləyib. Demokrat senator Con Fetterman isə sənədin əleyhinə səs verib.
“The Guardian” bildirir ki, qətnamə əsasən simvolik xarakter daşısa da, Konqresdə Tramp administrasiyasının İran siyasəti ilə bağlı narahatlığın artdığını göstərir.
Tramp isə bu addımın onun işini çətinləşdirdiyini bildirib. O, buna baxmayaraq, İranla bağlı məqsədlərinə çatacağını və “işi sona çatdıracağını” vurğulayıb.
