ABŞ Prezidenti Donald Tramp Apple-ın ölkə daxilində çip dizaynı və istehsalı üçün Intel-lə əməkdaşlıq edəcəyini açıqlayıb.
MSNews.az xəbər verir ki, “Reuters” agentliyinin məlumatına görə, Tramp bu barədə “Truth Social” platformasında paylaşım edib. Onun sözlərinə görə, Apple ABŞ-da öz çiplərinin dizaynı və istehsalı üçün Intel-lə işləməyə razılaşıb.
Agentlik yazır ki, belə bir razılaşma Intel üçün mühüm dəstək ola bilər. Apple kimi böyük texnologiya şirkətinin sifarişi Intel-in müqaviləli çip istehsalı biznesinə sabit tələb yaradaraq şirkətin TSMC ilə rəqabətdə mövqeyini gücləndirə bilər.
Apple üçün isə mümkün əməkdaşlıq istehsal bazasını şaxələndirmək və əlavə çip gücü əldə etmək baxımından əhəmiyyətlidir. Hazırda şirkət öz M seriyalı çiplərinin istehsalında əsasən Tayvanın TSMC şirkətinə güvənir.
Bununla belə, Tramp hansı çiplərin Intel tərəfindən istehsal olunacağını açıqlamayıb. Apple və Intel də hələlik “Reuters”in sorğusuna rəsmi şərh verməyib.
“Reuters” xatırladır ki, Intel uzun illər Apple-ın Mac kompüterləri üçün prosessor tədarükçüsü olub. Lakin Apple 2020-ci ildən etibarən Intel prosessorlarından imtina edərək TSMC tərəfindən istehsal olunan öz M seriyalı çiplərinə keçib.
Xəbərdən sonra Intel səhmlərinin bahalaşdığı bildirilir. Tramp administrasiyası son dövrlərdə ABŞ-ın yarımkeçirici istehsalını gücləndirmək və texnoloji təchizat zəncirlərində xarici asılılığı azaltmaq siyasətini önə çəkir.
