Tayvan Prezidenti Lay Çinq-te Esvatiniyə gözlənilməz səfərə gedib. “Reuters”-in məlumatına görə, səfər əvvəlcədən elan edilməyib və Tayvan tərəfi bunu mümkün xarici müdaxilə risklərini azaltmaq məqsədi ilə izah edib. Lay Esvatini Kralı III Msvati ilə görüşündə Tayvanın dünya ilə əlaqə qurmaq hüququna malik olduğunu bildirib.
Lay çıxışında “Çin Respublikası, Tayvan suveren dövlətdir” deyərək, 23 milyon tayvanlının beynəlxalq aləmlə münasibət qurmaq hüququ olduğunu vurğulayıb. Onun sözlərinə görə, heç bir ölkə Tayvanın dünyaya töhfə verməsinin qarşısını almağa çalışmamalıdır.
Səfər Çinlə Tayvan arasında diplomatik gərginliyin artdığı dövrdə baş tutub. Pekin Tayvanı öz ərazisinin bir hissəsi hesab edir və Taypeyin dövlətlərarası münasibətlər qurmasına qarşı çıxır. Çin Tayvan liderinin Esvatiniyə səfərini kəskin tənqid edib və Lay haqqında təhqiramiz ifadələr işlədib.
Tayvan daha əvvəl bildirmişdi ki, Çin üç Hind okeanı ölkəsinə təzyiq göstərərək Layın təyyarəsi üçün hava məkanı icazələrinin ləğvinə nail olub. “Reuters”-in məlumatına görə, bu səbəbdən Tayvan prezidentinin Esvatiniyə əvvəl planlaşdırılan səfəri təxirə düşmüşdü. Yeni səfər isə Esvatini hökumətinə məxsus təyyarə ilə həyata keçirilib.
Esvatini Tayvanla rəsmi diplomatik münasibətləri olan cəmi 12 ölkədən biridir və Afrikada Taypeyin yeganə rəsmi müttəfiqi sayılır. Layın səfəri Kral III Msvatinin hakimiyyətə gəlməsinin 40 illiyi ilə əlaqələndirilir.
ABŞ da Tayvan-Esvatini münasibətlərinə dəstək ifadə edib. ABŞ Dövlət Departamenti Tayvanı “etibarlı və bacarıqlı tərəfdaş” adlandırıb və Tayvanın beynəlxalq əlaqələrinin qlobal ictimaiyyət üçün faydalı olduğunu bildirib.
