Bosniya serbləri ordusunun keçmiş komandanı, Srebrenitsa soyqırımı və digər ağır beynəlxalq cinayətlərə görə ömürlük həbs cəzasına məhkum edilmiş Ratko Mladiç 84 yaşında vəfat edib.
MSNews.az xəbər verir ki, Mladiç avqustun 27-də Niderlandda, Haaqadakı BMT həbsxana xəstəxanasında ölüb. Onun ölümünü BMT-nin Beynəlxalq Cinayət Tribunalları üzrə Qalıq Mexanizmi rəsmən təsdiqləyib.
Son illərdə Mladiçin səhhəti ciddi şəkildə pisləşmişdi. Ailəsi və Serbiya hakimiyyəti onun humanitar əsaslarla azad edilməsini dəfələrlə istəsə də, BMT məhkəməsi bu müraciətləri təmin etməmişdi. Son belə müraciət onun ölümündən bir neçə gün əvvəl rədd edilmişdi.
Mladiç 1992–1995-ci illərdə Bosniya və Herseqovinada müharibə zamanı Bosniya Serb Respublikası Ordusunun Baş Qərargahına rəhbərlik edib. O, bu vəzifəyə 12 may 1992-ci ildə təyin edilmiş və 1996-cı ilin noyabrınadək ordunun komandanı olaraq qalmışdı.
Keçmiş Yuqoslaviya üzrə Beynəlxalq Cinayət Tribunalı 22 noyabr 2017-ci ildə Mladiçi soyqırımı, insanlığa qarşı cinayətlər və müharibə qanunları və adətlərinin pozulması üzrə təqsirli bilərək ömürlük həbs cəzasına məhkum edib.
Məhkəmə Mladiçi xüsusilə 1995-ci ilin iyulunda Srebrenitsada törədilmiş soyqırımında təqsirli bilib. Bosniya serb qüvvələri şəhərin ələ keçirilməsindən sonra 8 mindən çox bosniyalı müsəlman kişi və oğlanı qətlə yetirib. Srebrenitsa qətliamı Avropada İkinci Dünya müharibəsindən sonra törədilmiş ən ağır kütləvi qətl hadisələrindən biri hesab olunur.
Məhkəmə həmçinin Mladiçi Bosniyanın müxtəlif bölgələrində təqib, qətl, deportasiya və məcburi köçürülmədə, Sarayevonun uzunmüddətli mühasirəsi zamanı mülki əhaliyə qarşı terror və qanunsuz hücumlarda, eləcə də BMT əməkdaşlarının girov götürülməsində təqsirli bilib.
Mladiç ilk dəfə 1995-ci ilin iyulunda Haaqa Tribunalı tərəfindən ittiham olunub. Buna baxmayaraq, o, təxminən 16 il beynəlxalq ədalətdən gizlənə bilib.
Serbiya polisi Mladiçi 26 may 2011-ci ildə ölkənin şimalındakı Lazarevo kəndində həbs edib. O, mayın 31-də Haaqadakı tribunala təhvil verilib.
2017-ci il hökmündən sonra Mladiç qərardan apellyasiya şikayəti versə də, BMT-nin Qalıq Mexanizminin Apellyasiya Palatası 2021-ci ildə ömürlük həbs cəzasını qüvvədə saxlayıb.
Mladiç özünü təqsirli hesab etmirdi və məhkəmə prosesləri boyunca ittihamları rədd edirdi. Bununla belə, onun Srebrenitsa soyqırımı və digər cinayətlər üzrə məhkumluğu beynəlxalq məhkəmənin qüvvədə olan yekun qərarı olaraq qalır.
