Fransada 2027-ci il prezident seçkiləri ərəfəsində keçirilən sosial-demokrat sol qüvvələrin praymerizində Avropa Parlamentinin deputatı Rafael Qlüksmann qalib gəlib. Onun babasının vaxtilə SSRİ kəşfiyyatına işləməsi isə siyasətçinin ailə tarixini yenidən diqqət mərkəzinə gətirib.
MSNews.az xəbər verir ki, “Le Monde” qəzetinin məlumatına görə, 46 yaşlı Qlüksmann oktyabrın 11-də açıqlanan nəticələrə əsasən, səslərin 66,13 faizini toplayaraq ilk turdaca qələbə qazanıb. Bununla da o, Sosialist Partiyası və müttəfiq mərkəz-sol qüvvələrin 2027-ci il prezident seçkilərində dəstəkləyəcəyi namizəd olub.
Qlüksmann 79 613 səs toplayıb. Onun əsas rəqibi, Sosialist Partiyasının birinci katibi Olivye For 14 faizdən bir qədər çox səs qazanaraq ikinci yeri tutub. Sabiq prezidentliyə namizəd Seqolen Ruayal isə 7,62 faizlə üçüncü olub.
Səsvermədə ümumilikdə 120 mindən çox seçici iştirak edib. Nəticələrə görə, ikinci turun keçirilməsinə ehtiyac qalmayıb.
Bu fakt 2026-cı ilin yanvarında yayımlanan Les Glucksmann, une histoire de famille adlı sənədli filmin hazırlanması zamanı üzə çıxıb. Rafael Qlüksmann özü də babasının keçmiş fəaliyyəti barədə məlumatı həmin araşdırma vasitəsilə öyrənib. Rubin Qlüksmann 1940-cı ildə torpedalanmış gəmidə həyatını itirib.
Qeyd edək ki, Rafael Qlüksmann Avropa İttifaqının gücləndirilməsini və Ukraynaya dəstəyin davam etdirilməsini müdafiə edən siyasətçilərdəndir. O, Rusiya Prezidenti Vladimir Putinin siyasətini tənqid etməsi ilə də tanınır.
“Reuters” agentliyinin məlumatına görə, Qlüksmann prezident seçkilərində həm Makronun mərkəzçi siyasi xəttinə, həm də radikal solçu Jan-Lük Melanşonun mövqeyinə alternativ təqdim etmək niyyətindədir.
Bununla belə, Qlüksmann bütün Fransa solunun vahid namizədi deyil. Jan-Lük Melanşonun rəhbərlik etdiyi Təslimolmaz Fransa hərəkatı bu praymerizdə iştirak etməyib və sol düşərgədə siyasi fikir ayrılıqları davam edir.
