MSNews.az xəbər verir ki, bu barədə Moskva meri Sergey Sobyanin iyulun 12-də məlumat yayıb. Onun sözlərinə görə, dronların əksəriyyəti hava hücumundan müdafiə qüvvələri tərəfindən Moskva regionundan uzaq məsafədə zərərsizləşdirilib.
Sobyanin paytaxta yaxınlaşan 45 PUA-nın vurulduğunu açıqlayıb. Dron qalıqlarının düşdüyü ərazilərə fövqəladə xidmət əməkdaşlarının göndərildiyi bildirilib.
Beləliklə, “300 dron Moskvada vurulub” ifadəsi dəqiq deyil. Rusiya rəsmilərinin iddiasına əsasən, təxminən 300 PUA bütövlükdə Moskva regionuna doğru hərəkət edib, onlardan 45-i isə birbaşa paytaxta yaxınlaşarkən məhv edilib.
Hadisələr fonunda Vnukovo, Domodedovo və Jukovski hava limanlarında təyyarələrin qəbulu və yola salınmasına müvəqqəti məhdudiyyətlər tətbiq olunub. Rusiya Nəqliyyat Nazirliyinin məlumatına görə, pis hava şəraiti və hava məkanına qoyulan məhdudiyyətlər səbəbindən 32 təyyarə ehtiyat aerodromlarına yönləndirilib, 47 reys isə iki saatdan çox gecikib.
Moskva hakimiyyəti ilkin açıqlamalarda paytaxt ərazisində ölən, yaralanan və ya ciddi infrastruktur dağıntısı barədə məlumat verməyib.
Dronların sayı və onların hamısının Ukraynadan buraxılması ilə bağlı məlumatlar Rusiya rəsmilərinin açıqlamalarına əsaslanır. Bu rəqəmlər müstəqil mənbələr tərəfindən tam təsdiqlənməyib.
