Rusiya Prezidenti Vladimir Putin və Çin Xalq Respublikasının Sədri Si Cinpin Pekində keçirilən danışıqların yekununda iki ölkə arasında hərtərəfli tərəfdaşlıq və strateji qarşılıqlı fəaliyyətin daha da möhkəmləndirilməsi haqqında birgə bəyanat imzalayıblar. Görüş Çin paytaxtında, Böyük Xalq Zalında rəsmi qarşılanma mərasimindən sonra baş tutub.
MSNews.az “Reuters”-ə istinadən xəbər verir.
Danışıqlardan sonra tərəflər iqtisadiyyat, enerji, texnologiya, ticarət, elm, media və digər sahələri əhatə edən çoxsaylı əməkdaşlıq sənədləri imzalayıblar. Nəşr yazır ki, Putin və Si Cinpin hərtərəfli strateji koordinasiyanın gücləndirilməsinə dair bəyanat, həmçinin çoxqütblü dünya nizamını dəstəkləyən deklarasiya imzalayıblar.
Sənəddə Rusiya və Çin arasında Mehriban qonşuluq, dostluq və əməkdaşlıq haqqında müqavilənin fəaliyyət müddətinin uzadılması da nəzərdə tutulur. Çin mediasının məlumatına görə, Si Cinpin bu müqavilənin iki ölkə arasında uzunmüddətli mehriban qonşuluq və strateji koordinasiya üçün hüquqi əsas yaratdığını bildirib.
Birgə bəyanatda hərbi sahədə əməkdaşlığın davam etdirilməsi də əsas istiqamətlərdən biri kimi göstərilir. Moskva və Pekin silahlı qüvvələr arasında ənənəvi əlaqələri möhkəmləndirmək, birgə təlimlər və patrul xidməti təcrübəsini genişləndirmək niyyətində olduqlarını bildiriblər. Tərəflər bunu Rusiya-Çin münasibətlərinin strateji xarakter daşımasının mühüm elementi kimi təqdim edirlər.
İqtisadi blokda tərəflər ticarət əlaqələrinin gücləndirilməsi, sənaye kooperasiyasının genişləndirilməsi, avtomobil, aviasiya və gəmiqayırma kimi sahələrdə əməkdaşlığın artırılması barədə razılığa gəliblər. Liderlər imzalanan sənədlərlə ticarət, texnologiya və media mübadiləsi daxil olmaqla müxtəlif sahələrdə əməkdaşlığı daha da dərinləşdirməyi hədəfləyirlər.
Enerji sahəsi danışıqların əsas mövzularından biri olub. Putin Rusiyanın Yaxın Şərqdəki gərginlik fonunda etibarlı enerji təchizatçısı rolunu qoruduğunu bildirib. “Reuters”-in məlumatına görə, Çin Rusiya neftinin ən böyük alıcılarından biridir, lakin uzun müddətdir müzakirə olunan “Sibir Gücü-2” qaz kəməri üzrə qiymət və müddət kimi əsas məsələlər hələ tam həllini tapmayıb.
Bəyanatda kosmos sahəsində əməkdaşlığın davam etdirilməsi də əksini tapıb. Tərəflər Beynəlxalq Ay Tədqiqat Stansiyası da daxil olmaqla, ümumi maraqlara cavab verən iri kosmik layihələrin icrasını davam etdirmək niyyətindədirlər. Həmçinin peyk naviqasiyası üzrə əməkdaşlığın dərinləşdirilməsi, Rusiyanın QLONASS və Çinin “Beydoy” sistemlərinin bir-birini tamamlamasının təmin olunması nəzərdə tutulur.
Texnologiya və süni intellekt sahəsində də yeni əməkdaşlıq istiqamətləri müəyyənləşdirilib. “Reuters”-in məlumatına görə, Pekində yayılan birgə deklarasiyada süni intellektin iqtisadi islahatlar üçün vacib olduğu qeyd edilir, müdafiə, açıq mənbəli proqram təminatı və qlobal süni intellekt idarəçiliyi sahələrində daha sıx əməkdaşlığa çağırış edilir.
Humanitar sahədə tərəflər təhsil müəssisələri arasında birbaşa əlaqələrin inkişaf etdirilməsi, tələbə mübadiləsinin genişləndirilməsi və Rusiya-Çin Fundamental Tədqiqatlar İnstitutunun yaradılmasının dəstəklənməsi barədə razılığa gəliblər. Bundan başqa, kino, internet-media və tanınmış bloqerlər xətti ilə qarşılıqlı mübadilələrin artırılması da nəzərdə tutulur.
Sənəddə vətəndaşların qarşılıqlı səfərlərinin asanlaşdırılması da ayrıca qeyd olunub. Rusiya və Çin viza rəsmiləşdirilməsinin sadələşdirilməsi və insanlararası təmasların genişləndirilməsi istiqamətində işi davam etdirmək barədə razılığa gəliblər.
