Rusiya Prezidenti Vladimir Putin və İran Prezidenti Məsud Pezeşkian oktyabrın 8-də Türkmənistanın Avaza bölgəsində ikitərəfli görüş keçiriblər.
MSNews.az xəbər verir ki, görüş zamanı tərəflər Rusiya–İran münasibətlərinin inkişafı, iqtisadi əməkdaşlıq və Yaxın Şərqdə yaranmış vəziyyət ətrafında fikir mübadiləsi aparıblar.
Putin görüş zamanı bildirib ki, Rusiya İranın regiondakı münaqişənin siyasi-diplomatik yolla həlli istiqamətində səylərini görür və Moskva bu prosesə kömək etməyə hazırdır. O, İranın “münaqişəni başa çatdırmaq üçün real cəhdlər etdiyini” qeyd edib.
Rusiya Prezidenti həmçinin iki ölkə arasında iqtisadi əlaqələrə toxunaraq bildirib ki, 2025-ci ildə Rusiya ilə İran arasında ticarət dövriyyəsi 21 faizdən çox artıb və bu tendensiya 2026-cı ilin ilk yeddi ayında da davam edib.
Putin Pezeşkiandan İranın ali rəhbəri Müctəba Xameneiyə salamlarını çatdırmasını da xahiş edib.
Görüş Türkmənistanda keçirilən MDB Dövlət Başçıları Şurasının iclası və Xəzər Ekoloji Sammiti ərəfəsində baş tutub. Pezeşkian bu tədbirlərdə iştirak etmək üçün Türkmənistana səfər edib. Türkmənistan XİN-in məlumatına görə, İran Prezidenti MDB toplantısına xüsusi qonaq qismində qatılır.
