Rusiyanın “Vaqner” özəl hərbi şirkətinin mərhum qurucusu Yevgeni Priqojinin oğlu Pavel Priqojin atasından miras qalan biznes şəbəkəsini Afrikada genişləndirib. Araşdırmalara görə, 28 yaşlı Priqojin son üç ay ərzində Mərkəzi Afrika Respublikasından (MAR) Belarusa qızıl daşınmasını təşkil edib. Onun nəzarətindəki biznes strukturlarının illik gəlirinin 400 milyon dolları keçdiyi bildirilir.
MSNews.az xəbər verir ki, bu barədə ABŞ-nin “The Wall Street Journal” qəzeti yerli rəsmilərə, keçmiş “Vaqner” əməkdaşlarına və beynəlxalq tədqiqatçılara istinadən araşdırma dərc edib.
Danışıqların əsas mövzusu qızılın beynəlxalq nəzarət mexanizmlərindən yayınmaqla xaricə çıxarılması olub. Xüsusilə əvvəllər istifadə edilən Birləşmiş Ərəb Əmirlikləri bazarından yan keçən yeni ixrac marşrutları müzakirə edilib.
Qəzetin mənbələrinin iddiasına görə, MAR-ın mədən sənayesi naziri qızılın dövlət mülkiyyəti kimi rəsmiləşdirilməsi üçün sənədləşməyə kömək göstərməyə razılaşıb. Bundan sonra qiymətli metalın Belarus istiqamətində daşınmasına başlanılıb.
Beynəlxalq Mütəşəkkil Cinayətkarlığa Qarşı Qlobal Təşəbbüs (Global Initiative Against Transnational Organized Crime) təşkilatının hesablamalarına əsasən, qruplaşmanın nəzarət etdiyi ən böyük qızıl mədənində illik hasilatın dəyəri təxminən 250 milyon dollara çatır.
Priqojin ailəsinin qanuni və qanunsuz fəaliyyətlərlə əlaqələndirilən biznes strukturlarının ümumi illik gəliri isə 400 milyon dollardan çox qiymətləndirilir. Bu rəqəm müstəqil audit nəticəsi deyil, tədqiqatçıların hesablamasıdır.
Hazırda Mərkəzi Afrika Respublikasında Pavel Priqojinin rəhbərliyi altında təxminən 500 muzdlu döyüşçünün fəaliyyət göstərdiyi bildirilir. Onlar Prezident Fosten-Arkanj Tuaderanın təhlükəsizliyinin təmin edilməsində iştirak edir və hökumət qüvvələrinin üsyançılara qarşı əməliyyatlarına dəstək verirlər.
Atasının ölümündən sonra Moskva “Vaqner”in Afrikadakı fəaliyyətini Rusiya Müdafiə Nazirliyinə tabe olan “Afrika Korpusu”nun nəzarətinə keçirməyə çalışıb. Lakin qəzetin mənbələrinə görə, MAR Prezidenti Tuadera “Vaqner” döyüşçülərinin rusiyalı hərbçilərlə əvəz edilməməsini şəxsən xahiş edib.
Bu isə Pavel Priqojinin ölkədəki hərbi və iqtisadi mövqelərini saxlamasına şərait yaradıb.
Qeyd edək ki, Belarus vasitəsilə qızıl ixracı, silah ticarəti və narkotik dövriyyəsinə nəzarətlə bağlı məlumatlar jurnalist araşdırmasının mənbələrinə əsaslanır.
