Azərbaycan Respublikasının Prezidenti İlham Əliyev ABŞ Konqresinin Nümayəndələr Palatasının üzvü Abraham Hamadehi qəbul edib.
MSNews.az xəbər verir ki, bu barədə “Prezident.az” məlumat yayıb.
Görüşdə Prezident İlham Əliyev Donald Trampın ikinci dəfə hakimiyyətə gəlməsindən sonra Azərbaycan-ABŞ münasibətlərinin uğurla inkişaf etdiyini bildirib. Dövlət başçısı ABŞ Prezidenti ilə şəxsi münasibətlərinin yüksək səviyyədə olduğunu vurğulayıb.
Prezident İlham Əliyev Birləşmiş Ştatlara səfərlərini və Donald Trampla görüşlərini, həmçinin ABŞ-ın vitse-prezidenti Cey Di Vensin Azərbaycana səfərini məmnunluqla xatırladıb. Dövlət başçısı “Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası”nın imzalanmasının ikitərəfli münasibətlərin genişləndirilməsi baxımından tarixi rol oynadığını qeyd edib.
Söhbət zamanı Abraham Hamadehin ABŞ Konqresində Azadlığa Dəstək Aktına 907-ci düzəlişin ləğvi ilə bağlı irəli sürülmüş qanun layihəsinə həmmüəllif olmasının əhəmiyyəti də vurğulanıb. “AZƏRTAC” daha əvvəl yazmışdı ki, Hamadeh Azərbaycana yardımla bağlı məhdudiyyətlərin aradan qaldırılmasını nəzərdə tutan təşəbbüsə qoşulan konqresmenlərdən biridir.
Prezident İlham Əliyev Abraham Hamadehin Azərbaycana səfərinin uğurlu olacağına əminliyini ifadə edib.
Azərbaycanda olmaqdan məmnunluğunu bildirən ABŞ konqresmeni ölkəmizin coğrafi baxımdan çox nadir məkanda yerləşdiyini deyib. O, Azərbaycanda UFC və Formula 1 kimi mötəbər idman yarışlarının keçirildiyini də vurğulayıb.
Görüşdə Azərbaycan və ABŞ prezidentlərinin strateji tərəfdaşlığın dərinləşdirilməsi istiqamətində səylərinə toxunulub. Hər iki liderin dövlətlərarası münasibətlərin inkişafına böyük önəm verdiyi qeyd edilib.
Söhbət zamanı Donald Trampın Azərbaycanla Ermənistan arasında sülh gündəliyinin irəli aparılmasında rolu xüsusi vurğulanıb. Regional nəqliyyat bağlantılarının inkişafı baxımından TRIPP dəhlizinin yaradacağı imkanlar da müzakirə olunub.
Tərəflər Azərbaycanla ABŞ Konqresi arasında dialoqun möhkəmləndirilməsi barədə fikir mübadiləsi aparıblar. Görüşdə iqtisadi-ticari əlaqələr, sərmayə, enerji, təhlükəsizlik, nəqliyyat bağlantıları, texnologiya və digər sahələrdə əməkdaşlığın genişləndirilməsi üçün yaxşı imkanların olduğu bildirilib.
ABŞ Konqresinin üzvü Abraham Hamadeh Arizona ştatının 8-ci konqres dairəsini təmsil edir.
Görüş Azərbaycan-ABŞ münasibətlərində siyasi dialoqun və strateji tərəfdaşlığın genişləndirilməsi baxımından mühüm hadisə kimi qiymətləndirilir.
