Ermənistanın Baş naziri Nikol Paşinyan Ukrayna Prezidenti Volodimir Zelenskinin İrəvana səfəri ilə bağlı Rusiyadan səslənən tənqidlərə münasibət bildirib. O, Zelenskinin Ermənistana səfərinin qeyri-adi hadisə kimi təqdim olunmasını düzgün saymadığını deyib.
“TodayPress TV”-nin məlumatına görə, Paşinyan çıxışında “Zelenski niyə Ermənistana gəlməməlidir?” sualını səsləndirib və Ermənistan–Azərbaycan münaqişəsi dövründə Rusiya Prezidentinin Azərbaycana səfərlərini xatırladaraq, həmin vaxt İrəvanın bu məsələni problem kimi qaldırmadığını bildirib.
Məsələ Zelenskinin mayın 4-də İrəvanda keçirilən Avropa Siyasi Birliyinin sammitində iştirakı və orada səsləndirdiyi bəyanatlardan sonra gündəmə gəlib. Rusiya Xarici İşlər Nazirliyi Zelenskinin çıxışını “qəbuledilməz” adlandıraraq Ermənistanın Moskvadakı səfiri Qurgen Arsenyanı nazirliyə çağırıb. Moskva İrəvanın Zelenskinin bəyanatlarına mənfi reaksiya verməməsindən narazılığını ifadə edib.
Paşinyan isə bildirib ki, Ermənistan çoxtərəfli platformalarda səslənən hər bir bəyanata reaksiya vermək və ya onları “senzuradan keçirmək” öhdəliyi daşımır. Onun sözlərinə görə, Avropa Siyasi Birliyi sammiti yalnız Ermənistanın tədbiri deyil, çoxsaylı tərəfdaşların iştirak etdiyi beynəlxalq formatdır. Paşinyan həmçinin Ermənistanın “kiçik gündəlikləri olan kiçik ölkə” olduğunu və Rusiya-Ukrayna münasibətlərini tənzimləmək iddiasında olmadığını vurğulayıb.
Baş nazir eyni zamanda Ermənistanın Ukrayna məsələsində Rusiyanın müttəfiqi olmadığını təkrarlayıb. O bildirib ki, İrəvan Ukraynaya humanitar yardım göndərib və Ermənistan Rusiya-Ukrayna müharibəsində tərəf kimi çıxış etmir.
Bununla yanaşı, Paşinyan Ermənistanın Rusiyaya qarşı yönəlmiş addımlara qoşulmayacağını da bəyan edib. O, Ermənistanın heç vaxt Rusiyanın maraqlarına zərər vurmaq gündəliyində olmadığını və heç bir qüvvənin İrəvanı Rusiyaya qarşı fəaliyyət məntiqinə cəlb edə bilməyəcəyini bildirib.
