Vatikan Dövlətinin başçısı Papa XIV Leo Ukraynada davam edən müharibə ilə bağlı beynəlxalq ictimaiyyətə çağırış edərək, bu münaqişənin sona çatdırılması üçün səylərin intensivləşdirilməsinin vacibliyini vurğulayıb. Papa ənənəvi bazar duasını Vatikanın Müqəddəs Pyotr Bazilikasına baxan ofisinin pəncərəsindən icra etdikdən sonra etdiyi çıxışda Rusiya–Ukrayna müharibəsinə toxunub.
Papa XIV Leo bildirib ki, son günlər Ukraynada bütün əhalini sərt qış soyuğu ilə üz-üzə qoyan davamlı hücumlar həyata keçirilir və bu hadisələri dərin kədərlə izləyir. O, baş verənlərin mülki əhali üçün ağır nəticələr doğurduğunu deyərək əziyyət çəkən insanlara mənəvi yaxınlığını ifadə edib və onlar üçün dua etdiyini qeyd edib.
Papa çıxışında vurğulayıb ki, düşmənçiliyin davam etməsi mülki insanlar üçün getdikcə daha ciddi nəticələr yaradır, xalqlar arasındakı uçurumu dərinləşdirir və ədalətli, davamlı sülh perspektivini uzaqlaşdırır. O, bütün tərəfləri bu müharibəyə son qoymaq üçün səyləri daha da gücləndirməyə çağırıb.
Eyni zamanda, Ukrayna Prezidenti Volodimir Zelenski də sosial şəbəkələrdə paylaşdığı açıqlamada Rusiyanın son bir həftə ərzində Ukraynaya qarşı hava hücumları həyata keçirdiyini, bu hücumlarda enerji infrastrukturu da daxil olmaqla mülki və kritik obyektlərin hədəf alındığını bildirib.
Digər tərəfdən, yanvarın 23–24-də Birləşmiş Ərəb Əmirliklərinin paytaxtı Əbu-Dabidə Rusiya, Ukrayna və ABŞ nümayəndələri arasında müharibənin sona çatdırılmasına yönəlmiş üçtərəfli danışıqlar aparılıb. Bu görüşlər diplomatik səylərin davam etdiyini göstərsə də, hələlik konkret nəticələr açıqlanmayıb.
Mövzu ilə bağlı açıqlama verən Kremlin sözçüsü Dmitri Peskov bildirib ki, Rusiya və ABŞ arasında keçirilən Ankoric sammitində Ukraynada ərazi məsələsinin həlli üçün müəyyən bir formul hazırlanıb və bu mexanizmin tətbiqi son dərəcə vacibdir. “Rossiya-1” televiziya kanalına danışan Peskov, beynəlxalq münasibətlərdə ikili standartların mövcudluğuna diqqət çəkərək, Avropanın uzun illər davam edən bu yanaşmasının hazırkı geosiyasi dəyişikliklərə yol açdığını iddia edib.
Peskov həmçinin Avropanın Rusiyadan müstəqil olduqdan sonra ABŞ-dan asılı vəziyyətə düşdüyünü, Avropa liderlərinin ABŞ Prezidenti Donald Trampın sərt siyasi mövqeyinə qarşı dura bilmədiklərini söyləyib. Onun sözlərinə görə, Ukrayna böhranının həlli prosesi uzun müddət davam edə bilər, lakin Ankoric sammitində razılaşdırılmış ərazi məsələsinə dair formulanın icrası həlledici əhəmiyyət daşıyır.
