Moldova Prezidenti Maya Sandu 44 yaşlı maliyyəçi Vasile Tofanın ölkənin baş naziri vəzifəsinə namizədliyini irəli sürüb.
MSNews.az xəbər verir ki, bu barədə həm Moldova Prezident Administrasiyası, həm də “Reuters” məlumat yayıb. Sandu müvafiq sərəncamı iyulun 11-də imzalayıb.
Tofan investisiya şirkəti “Horizon Capital”da baş tərəfdaş və İnvestisiya Komitəsinin üzvüdür. Şirkətin rəsmi məlumatına görə, o, 2012-ci ildən burada çalışır, daha əvvəl idarəetmə məsləhətçiliyi, texnologiya və istehlak bazarı üzrə fəaliyyət göstərib. Tofan Harvard Biznes Məktəbində MBA təhsili alıb.
Baş nazirliyə namizəd üç əsas məqsədinin dövlət institutlarına ictimai etimadı bərpa etmək, Moldova biznesində nikbinliyi gücləndirmək və ölkənin Avropa İttifaqına üzvlük prosesini sürətləndirmək olduğunu bildirib. O, hökumətinin 2028-ci ilin sonunadək Aİ-yə qoşulma sazişinin imzalanmasına nail olmağı hədəflədiyini deyib. (Reuters)
Sandu Tofana yeni kabineti formalaşdırmaq, hökumət proqramını hazırlamaq və parlamentə təqdim etmək üçün 15 gün vaxt verib. Hakim Fəaliyyət və Həmrəylik Partiyasının — PAS-ın 101 yerlik parlamentdə 55 mandatı olduğuna görə onun hökumətinin təsdiqlənəcəyi gözlənilir. Müxalifət partiyalarının əksəriyyəti isə namizədin müəyyənləşdirilməsi ilə bağlı prezidentin keçirdiyi məsləhətləşmələrdə iştirak etməyib.
Əvvəlki baş nazir Aleksandru Munteanu iyulun əvvəlində cəmi səkkiz aylıq fəaliyyətindən sonra istefa verib. O, vəzifəsini şəxsi prinsiplərinə uyğun şəkildə davam etdirə bilmədiyini desə də, qərarının səbəblərini ətraflı açıqlamayıb.
Moldova 2022-ci ildən Aİ-yə namizəd ölkədir, üzvlük danışıqları isə 2024-cü ildə rəsmən başlayıb. 2026-cı ilin iyununda danışıqlar prosesinin ilk klasteri açılıb.
