İtaliya milli paralimpiya oxatma komandasının üzvü, dünya çempionu Matteo Bonacina seksual zorakılıq və təqib ittihamları üzrə aparılan istintaq çərçivəsində ev dustaqlığına yerləşdirilib.
ANSA-nın məlumatına görə, işi Roma Prokurorluğu və Poçt Polisi araşdırır. Bonacina 2023-cü ildə fərdi yarışda dünya çempionu olub, həmçinin Rio, Tokio və Paris Paralimpiya Oyunlarında iştirak edib.
İstintaq materiallarına görə, 41 yaşlı idmançının 2019–2024-cü illər ərzində milli komandanın ən azı beş qadın idmançısını və bir qadın məşqçini narahat etdiyi iddia olunur. İtaliya mediası zərərçəkənlər arasında yetkinlik yaşına çatmayan şəxslərin də olduğunu yazır. Bonacinanın qadın idmançılara istənməyən intim mesajlar və şəkillər göndərdiyi, bəzi hallarda isə təzyiq və seksual xarakterli davranışlarda ittiham edildiyi bildirilir.
“La Repubblica”nın ilk yaydığı məlumata görə, istintaqda diqqət çəkən epizodlardan biri Paris-2024 Paralimpiadası ərəfəsində baş verib. İddialara əsasən, Bonacina adı açıqlanmayan italiyalı idmançıdan “uğur talismanı” kimi qırmızı alt paltarı istəyib. Başqa bir epizodda isə onun Paris Oyunları zamanı hoteldə digər idmançıya qarşı zorakılığa cəhd etdiyi iddia olunur.
İtaliya mediası həmçinin milli komandanın texniki rəhbərlərindən birinin də istintaqa cəlb olunduğunu yazır. “Corriere della Sera”-nın məlumatına görə, həmin şəxs idmançıların şikayətlərini yetərincə araşdırmamaqda və onları susdurmaqda şübhəli bilinir.
İtaliya Paralimpiya Komitəsinin prezidenti Marko Ciunio De Sanktis məsələ ilə bağlı açıqlamasında istintaqın öz axarı ilə getməli olduğunu bildirib. Hazırkı mərhələdə Bonacina barəsində məhkəmə hökmü yoxdur və ittihamlar istintaq çərçivəsində araşdırılır.
