Belarus Prezidenti Aleksandr Lukaşenko Ukraynanı Rusiya ilə müharibənin başa çatdırılması üçün sülh danışıqlarına getməyə çağırıb. O, prosesin uzanacağı təqdirdə Kiyevin gələcəkdə razılaşma əldə etmək imkanlarının daha da məhdudlaşacağını bildirib.
MSNews.az xəbər verir ki, Lukaşenko bu barədə oktyabrın 16-da Belarusun Vitebsk vilayətinə işgüzar səfəri zamanı jurnalistlərə açıqlamasında danışıb.
“İnterfaks” agentliyinin məlumatına görə, Belarus lideri müharibənin 2026-cı və ya 2027-ci ildə başa çatacağına inandığını söyləyib.
Belarus Prezidenti müharibənin davam etməsinin həm Ukraynaya, həm də Rusiyaya ciddi ziyan vurduğunu vurğulayıb.
Onun sözlərinə görə, Rusiya hərbi və iqtisadi baxımdan daha böyük imkanlara malik olsa da, uzunmüddətli müharibə Moskvanın iqtisadiyyatına da ağır təsir göstərir.
“Rusiya daha güclüdür və uzun müddət döyüşə bilər. Lakin tükənmə çox ciddidir, iqtisadiyyata təsiri də böyükdür. Ruslar bunu anlayırlar və sülhə hazırdırlar”, – deyə o bildirib.
“Anadolu Agentliyi”nin məlumatına görə, Lukaşenko ABŞ Prezidenti Donald Trampın Ukraynanın siyasi rəhbərliyi ilə bağlı açıqlamalarına da münasibət bildirib. O, Ukraynaya kimin rəhbərlik etməli olduğuna yalnız ukraynalıların qərar verməli olduğunu vurğulayıb.
Qeyd edək ki, Lukaşenkonun açıqlamaları Ukraynada müharibənin dayandırılması istiqamətində diplomatik səylərin davam etdiyi dövrə təsadüf edir. Lakin Moskva və Kiyev arasında sülh razılaşmasının şərtləri ilə bağlı ciddi fikir ayrılıqları qalır.
