Uruqvay millisinin tarixi bombardiri Luis Suares təxminən iki ildən sonra milli komandaya qayıda bilər. Yeni baş məşqçi Dieqo Forlan 39 yaşlı hücumçunun sentyabr toplanışına dəvət olunması ehtimalını açıq saxlayıb.
MSNews.az xəbər verir ki, uruqvaylı jurnalist Sebastyan Covanelli Suaresin yenidən yığmaya çağırıla biləcəyini bildirib. Bununla belə, Uruqvay Futbol Assosiasiyası hələ Suaresin sentyabr oyunları üçün heyətə daxil edildiyini rəsmən açıqlamayıb.
Forlan özü də avqustun 10-da təqdimatı zamanı keçmiş komanda yoldaşının qayıdışını istisna etməyib. O, Suaresin təcrübəsini və qol vurmaq qabiliyyətini vurğulayaraq deyib:
“Luis kimi təcrübəli və qol vurmağa davam edən futbolçunun olması… niyə də yox? Buna daha sonra baxacağıq”.
Bu açıqlamanı Uruqvayın “Montevideo Portal” nəşri də yayıb.
Uruqvay Futbol Assosiasiyası avqustun 6-da Dieqo Forlanın həm U-20, həm də əsas milli komandaya rəhbərlik edəcəyini rəsmən açıqlayıb. Forlanın əsas yığmada ilk sınağı sentyabr-oktyabr FIFA pəncərəsində olacaq.
Uruqvay sentyabrda Asiya turnesi çərçivəsində 24 sentyabrda Yaponiya, 28 sentyabrda isə Cənubi Koreya ilə yoldaşlıq oyunları keçirəcək.
Suares Uruqvay millisində son oyununu 6 sentyabr 2024-cü ildə Paraqvaya qarşı keçirərək beynəlxalq karyerasını başa vurduğunu elan etmişdi. Uruqvay Futbol Assosiasiyasının statistikasına görə, hücumçu milli komandada 143 oyunda 69 qol vurub və ölkə tarixinin ən məhsuldar futbolçusudur.
Lakin 2026-cı il dünya çempionatı ərəfəsində Suares qərarını yenidən nəzərdən keçirməyə hazır olduğunu bildirmişdi. “Reuters” may ayında onun milli komandaya ehtiyac yaranacağı təqdirdə geri dönməyə hazır olduğunu yazmışdı. Buna baxmayaraq, o vaxtkı baş məşqçi Marselo Bielsa Suaresi mundialın heyətinə daxil etməmişdi.
Hazırda Suares “Inter Miami”də çıxışını davam etdirir. 24 yanvar 1987-ci il təvəllüdlü futbolçunun 39 yaşı var.
