Latın Amerikası dünyanın ən ritmik və enerjili bölgələrindən biridir. Bu qitədə rəqs sadəcə əyləncə deyil — həyat tərzidir. İnsanlar daha uşaq yaşlarından həm musiqi duyumu, həm də bədən plastikasını formalaşdırır və nəticədə görkəmli rəqs mədəniyyəti ortaya çıxır.
Salsa
Kuba mənşəli salsa ispan və Afrika ritmlərinin harmoniyasından yaranan fiqurlarla zəngin, alovlu rəqsdir. Bu rəqsi öyrənmək üçün texnika kifayət etmir — latın amerikalıların dediyi kimi, salsanı sadəcə oynamırsan, hiss edirsən. Bu üslub həm Amerikada, həm Avropada, həm də dünyanın müxtəlif yerlərində rəqs məktəblərinin əsas proqramına daxil edilib.
Baçata
Dominikanda formalaşan baçata zərif, romantik və eyni zamanda təmaslı rəqs növüdür. Lirik melodiyalar cütlüklərin bir-birinə yaxın durmasını və emosional ahəngi hiss etməsini tələb edir. Dominikan rəqqaslarının məşhur sözləri bunu çox yaxşı izah edir: “Partnyorunun bədən ritmini duy — qalanı özü gələcək.”
Merenqe
Merenqe qıvraq ritmi ilə seçilən ənənəvi Dominikan rəqsidir. Tambur və quira kimi alətlərin yaratdığı sürətli temp burada əsas rol oynayır. XIX əsrdə yaranmış merenqe, xüsusilə, yaşlı nəsil arasında sevilir, ancaq son illər gənclər də bu enerjili ritmə maraq göstərməyə başlayıb.
Reqqeton
Latın Amerikasının ən açıq, sərbəst və ehtiraslı rəqslərindən biri reqqetondur. Bu üslub sərhəd tanımır — bədəni ritmin axınına buraxmaq kifayətdir. Əsas məqsəd instinktiv enerji və ritmi hiss edərək sərbəst ifadə azadlığı yaratmaqdır.
Tanqo
Tanqo deyiləndə ilk olaraq, Argentina yada düşür. Düzdür, argentinalıların hamısı tanqonun vurğunu deyil, amma bu rəqs ölkənin mədəni simvollarından biridir. Tanqo açıq sensual məzmun daşısa da, burada əsas rol ehtirasa deyil, dərin emosiyalara və hisslərin qarşılıqlı ifadəsinə verilir.
Samba
Samba Braziliyanın karnaval ruhunu ən güclü şəkildə təcəssüm etdirən rəqslərdən biridir. Parlaq kostyumlar, cazibədar ritm və Afrikadan gələn güclü təsirlə formalaşmış plastika bu rəqsin əsas elementləridir. Sambanın onlarca növü var və Braziliyada demək olar ki, hər kəs — hətta favelalarda yaşayanlar belə — sambanın ən az bir versiyasını bilir.
Kumbiya
Kolumbiyanın sahilyanı bölgələrindən dünyaya yayılan kumbiya folklor mənşəli rəqs növüdür. Fleyta, marakas, tamburin, akkordeon və gitaranın müşayiəti bu rəqsin özünəməxsus təbiiliyini daha da gücləndirir. Kumbiya bu gün artıq yalnız Kolumbiyada deyil, bütöv Latın Amerikada sevilir.
Forro
Forro, Braziliyanın şimal-şərqindən çıxan, duyğulu melodiyaları ilə seçilən rəqsdir. Əvvəllər daha çox kənd həyatını, insanların gündəlik məişətini təsvir edən bu üslub zamanla sevgi, ayrılıq və həyat hekayələri kimi mövzularla zənginləşmişdir. Akkordeonun dominantlığı forroya xüsusi lirika və yumşaqlıq qatır.
