Küveyt daha 415 nəfərin vətəndaşlığını ləğv edib. Qərarlar ölkənin rəsmi qəzeti “Kuwait Al Youm”da dərc olunan altı fərmanla rəsmiləşdirilib və bəzi hallarda həmin şəxslər vasitəsilə vətəndaşlıq əldə edən şəxslərə də şamil olunur.
MSNews.az xəbər verir ki, “Gulf News” məlumatına görə, 2026-cı il üzrə 155–160 nömrəli fərmanlar ümumilikdə 415 əsas şəxsi əhatə edir. Ən böyük qrup 286 nəfərdən ibarətdir. Digər fərmanlarla 6, 14, 25, 41 və 43 nəfərin vətəndaşlığı geri alınıb.
Fərmanlarda hər bir şəxsin vətəndaşlıqdan məhrum edilməsinin konkret səbəbi ayrıca göstərilməyib. Bununla belə, Küveyt qanunvericiliyi saxtakarlıq və yanlış məlumatla vətəndaşlıq əldə edilməsi, icazəsiz ikili vətəndaşlıq və dövlətin “ali maraqları”na zidd hesab edilən fəaliyyətlər kimi hallarda vətəndaşlığın ləğvinə imkan verir.
Bu qərarlar Küveytdə son iki ildə aparılan genişmiqyaslı vətəndaşlıq yoxlamalarının davamıdır. “The National” yazır ki, 2025-ci ildə təxminən 50 min nəfər vətəndaşlıqdan məhrum edilib. 2026-cı ilin iyununda isə daha 2,1 mindən çox şəxsin vətəndaşlığı ləğv olunub.
Kampaniya 2026-cı ildə regionda təhlükəsizlik tədbirlərinin sərtləşdirilməsi fonunda da davam edib. “Amnesty International”ın məlumatına görə, İranla müharibə dövründə Küveyt və digər Körfəz ölkələrində milli təhlükəsizliklə bağlı qanunlar və məhdudiyyətlər genişləndirilib. Təşkilat apreldə Küveytdə 1200-dən çox şəxsin vətəndaşlığının bir fərmanla ləğv edildiyini və fərmanda fərdi səbəblərin göstərilmədiyini bildirib.
“The Economist” iyunda yayımlanan təhlilində Küveytdə daxili nəzarətin sərtləşdirilməsini regiondakı təhlükəsizlik böhranı ilə əlaqələndirib. Nəşrin danışdığı narazı təhlükəsizlik əməkdaşlarından biri vəziyyəti belə təsvir edib: “Biz hamımız şübhəli şəxsik.”
Bununla yanaşı, hüquq müdafiə təşkilatları vətəndaşlığın kütləvi şəkildə ləğvinin bəzi şəxsləri vətəndaşsız vəziyyətə sala biləcəyini və bunun ifadə azadlığına təsir etdiyini bildirirlər. Küveyt hakimiyyəti isə tədbirləri vətəndaşlıq sistemində pozuntuların aradan qaldırılması və milli təhlükəsizliyin qorunması ilə əsaslandırır.
