Kuba hökuməti ABŞ ilə rəsmi danışıqlara başladığını açıqlayıb. Bu barədə ölkə prezidenti Migel Díaz‑Kanel dövlət televiziyası vasitəsilə xalqa müraciətində bildirib. Onun sözlərinə görə, danışıqlar iki ölkə arasında mövcud olan fikir ayrılıqlarını dialoq yolu ilə həll etməyə yönəlib.
Prezident qeyd edib ki, danışıqlar Kubanın sabiq prezidenti Raul Kastro ilə birlikdə aparılır və əsas məqsəd uzun illər davam edən qarşıdurmanı azaltmaqdır.
Son aylarda Kuba ciddi iqtisadi böhran yaşayır. ABŞ prezidenti Donald Tramp tərəfindən tətbiq olunan neft blokadası nəticəsində ölkəyə artıq üç aydır ki, yanacaq daxil olmur. Bu isə elektrik enerjisi istehsalına ciddi təsir göstərərək ölkədə uzunmüddətli elektrik kəsintilərinə səbəb olub.
Havana sakinləri son günlər gündə 12 saatdan çox elektrik kəsintisi ilə üzləşirlər. Yanacaq və dərman qıtlığı, həmçinin bahalaşma Kubada sosial narazılığı daha da artırıb. Yerli sakinlər isə ABŞ ilə danışıqları vəziyyətin yaxşılaşması üçün mümkün çıxış yolu kimi qiymətləndirirlər.
Vaşinqton tərəfi də danışıqları təsdiqləyib. Ağ Ev rəsmisi bildirib ki, ABŞ Kubanın razılaşmaya gəlməsini gözləyir və prezident Donald Tramp belə bir razılaşmanın “çox asanlıqla əldə oluna biləcəyini” düşünür.
Bununla yanaşı, Kuba tərəfi vurğulayıb ki, danışıqlar yalnız hər iki ölkənin siyasi sisteminə hörmət və dövlət suverenliyi prinsipi əsasında aparılmalıdır.
Prezident Díaz-Kanel həmçinin bildirib ki, ABŞ ilə danışıqlarla paralel olaraq ölkə enerji asılılığını azaltmaq üçün daxili neft və qaz hasilatını artırır, eləcə də günəş enerjisi istehsalını genişləndirməyə çalışır.
