Keniyada yerləşən Kitum mağarası daşıdığı bioloji riskə görə dünyanın ən təhlükəli mağaralarından biri hesab olunur.
MSNews.az xəbər verir ki, sözügedən mağara, xüsusilə, burada yaşayan on minlərlə yarasanın daşıdığı Marburq virusu səbəbindən diqqət mərkəzinə düşüb. Mütəxəssislər bildirirlər ki, bu virus insana yoluxduğu halda son dərəcə ağır nəticələrə və yüksək ölüm riskinə səbəb olur.
Məlumata görə, mağara dağın içinə 200 metrdən çox uzanır və divarlarında çoxsaylı Misir yarasaları yaşayır. 1980-ci illərdə mağaranı ziyarət etdikdən sonra Marburq virusuna yoluxan iki nəfərin həyatını itirməsi bölgəyə marağı daha da artırıb. Həmin hadisələrdən sonra Kitum mağarası bioloji təhlükə baxımından xüsusi diqqətlə izlənən məkanlardan birinə çevrilib.
Marburq xəstəliyi insan orqanizmində güclü daxili qanaxmalar, ağırlaşmış infeksiya və orqan çatışmazlığı yarada bilir. Xəbərdə qeyd olunur ki, hazırda bu virusa qarşı tam təsdiqlənmiş peyvənd və ya antiviral müalicə vasitəsi mövcud deyil. Virusun yüksək yoluxduruculuğu və ölüm göstəricisinin 88 faizə qədər çatması onu ən qorxulu yoluxucu təhlükələrdən birinə çevirir.
Kitum mağarası təkcə virus təhlükəsi ilə deyil, həm də təbii xüsusiyyəti ilə seçilir. Bu məkan “fil mağaraları”ndan biri kimi tanınır. Fillər mağaranın divarlarını dişləri ilə qaşıyaraq oradan mineral və duz əldə edirlər. Mütəxəssislərin fikrincə, fillər Marburq virusuna qarşı təbii müqavimətə malik olduqları üçün bu mühitdə qala bilirlər, lakin insanlar üçün eyni vəziyyət keçərli deyil.
Ekspertlər vurğulayırlar ki, Kitum mağarası adi turist marağından daha çox, bioloji təhlükəsizlik baxımından qiymətləndirilməlidir. Məhz, buna görə də bu mağara dünyanın ən təhlükəli təbii məkanlarından biri kimi təqdim olunur.
