İsveçrə Alplarının Brünig dağ massivində dünyanın varlı müştəriləri üçün yüksək təhlükəsizlikli yeraltı saxlanc kompleksi yaradılır. Layihədə qiymətlər təxminən 1 milyon İsveçrə frankından başlayır, müştərilərə isə məkanlardan 99 il istifadə hüququ verilir.
MSNews.az xəbər verir ki, “Le Figaro” kompleksin Obvalden kantonunun Lungern kommunası yaxınlığında, dağın təxminən 100 metr dərinliyində qurulduğunu yazır. “Brünig Mega Safe” adlanan layihənin təşəbbüskarı yeraltı tikinti sahəsində uzun illər fəaliyyət göstərən isveçrəli sahibkar Tomas Gasserdir.
Kompleksdə incəsənət əsərləri, qiymətli metallar və zinət əşyaları, kolleksiya avtomobilləri, bahalı şərablar və digər yüksək dəyərli aktivlərin saxlanması nəzərdə tutulur. “Le Figaro” həssas məlumatların saxlanmasının da mümkün olacağını bildirir. Ən iri yeraltı məkanların ölçüsünün futbol meydançasına qədər çata biləcəyi qeyd olunur.
İsveçrənin ictimai media platforması “SWI swissinfo.ch” isə hazırkı layihədə təxminən 20 yeraltı saxlanc məkanından bəhs edir. Onlar 100 metrdən artıq qalınlığa malik qaya qatının altında yerləşəcək. Layihə müəllifləri təhlükəsizlik səviyyəsini İsveçrə Milli Bankının ehtiyatlarının qorunması ilə müqayisə edirlər. Müştərilər kompleksə daxil olarkən bir neçə mərhələli yoxlamadan keçəcəklər, təhlükəsizlik sisteminin detalları isə açıqlanmır.
Mənbələrdə obyektlərin yekun sayı ilə bağlı fərqli rəqəmlər yer alır. “Le Figaro” gələcəkdə 100-ə yaxın kaverna yaradılmasının nəzərdə tutulduğunu yazsa da, “SWI swissinfo.ch” və İsveçrənin “SRF” telekanalının məlumatlarında layihənin hazırkı mərhələsi üçün təxminən 20-25 kaverna göstərilir. Buna görə 100 rəqəmi layihənin daha geniş perspektiv planı kimi qiymətləndirilə bilər.
Tomas Gasserin sözlərinə görə, geosiyasi qeyri-sabitlik fonunda təhlükəsiz saxlanc yerlərinə maraq yüksəlib. O bildirib ki, əvvəllər təhlükəsiz məkan kimi qəbul edilən Dubaya münasibət də dəyişib və varlı şəxslər aktivlərinin bir hissəsini daha qorunan yerlərdə saxlamağa çalışırlar. Bir neçə müştərinin artıq layihəyə qoşulduğu bildirilir.
Müştərinin istifadə etdiyi yer ayrıca daşınmaz əmlak vahidi kimi qeydiyyata alına və hətta girov qoyula bilər. Kompleksin istifadəyə verilməsinin 2027-ci ildə başlanması planlaşdırılır.
