İsrail ordusu bildirib ki, İsrail–Livan atəşkəsi qüvvəyə mindikdən sonra Cənubi Livanda əməliyyatlarını davam etdirib. Ordunun açıqlamasına görə, indiyədək hərbçilər çoxsaylı silah-sursat aşkarlayıb, Hərbi Hava Qüvvələri ilə birlikdə isə İsrail qüvvələri üçün təhdid sayılan 25-dən çox “Hizbullah” üzvü zərərsizləşdirilib. Eyni açıqlamada İsrail aviasiyasının qruplaşmanın döyüşçüləri və infrastrukturuna qarşı təxminən 50 zərbə endirdiyi iddia olunur.
MSNews.az məlumatı “The Times of Israel”-ə istinadən verir.
Beynəlxalq media isə təsdiqləyir ki, atəşkəsə baxmayaraq Cənubi Livanda gərginlik səngiməyib. ABŞ vasitəçiliyi ilə əldə olunan 10 günlük atəşkəs ötən həftə qüvvəyə minib, lakin həm zərbələr, həm də sərhəd bölgəsində qarşılıqlı ittihamlar davam edir.
Hazırkı vəziyyətdə İsrail ordusu Cənubi Livanda saxladığı mövqeləri “təhlükəsizlik zolağı” yaratmaq məqsədi ilə əsaslandırır. Livan tərəfi isə yaşayış evlərinin dağıdılması və qoşunların qalması ilə bağlı etiraz edir və bu məsələni Vaşinqtonda keçiriləcək nadir birbaşa danışıqlarda gündəmə çıxarmağa hazırlaşır.
Son günlər zərbələrin humanitar nəticələri də diqqət çəkir. Aprelin 22-də Cənubi Livanda İsrail zərbələri nəticəsində livanlı jurnalist Amal Xəlil həlak olub, daha bir jurnalist yaralanıb. İsrail ordusu həmin epizodda “Hizbullah”la əlaqəli avtomobilləri hədəfə aldığını bildirib və jurnalistlərin qəsdən vurulmasını rədd edib.
