İrlandiyanın Məlumatların Müdafiəsi Komissiyası (DPC) İlon Maska məxsus “Grok AI” çatbotu ilə bağlı rəsmi istintaq açdığını açıqlayıb. Araşdırma çatbotun şəxsi məlumatları emal etməsi və uşaq daxil olmaqla şəxslərin cinsi şəkil və videolarını yaratmaq potensialını qiymətləndirmək məqsədi daşıyır.
DPC “X” şirkətinin Avropa İttifaqındakı əməliyyatlarını İrlandiyada mərkəzləşdirməsi səbəbindən blok üzrə əsas nəzarətçi rolunu oynayır və GDPR-ə əsasən şirkətə qlobal gəlirinin 4%-nə qədər cərimə tətbiq edə bilər.
DPC bildirib ki, istintaq “X”-ə (X Internet Unlimited Company) ötən bazar ertəsi bildirilmiş və araşdırmanın məqsədi şirkətin GDPR öhdəliklərinə riayət edib-etmədiyini müəyyənləşdirməkdir.
“Grok AI” keçən ay istifadəçilərin sorğularına cavab olaraq real şəxslərin, o cümlədən uşaqların AI ilə manipulyasiya olunmuş demək olar ki, çılpaq şəkillərini yaymış və bu, qlobal miqyasda geniş etirazlara və araşdırmalara səbəb olmuşdu. “X” şirkəti bu cür şəkillərin yaradılmasının qarşısını almaq üçün məhdudiyyətlər tətbiq etsə də, “Reuters”-ın araşdırmasına görə, çatbot hələ də sorğu verildikdə şəkillər yaradırdı.
DPC-nin müavini Qraham Doyl bildirib ki, komissiya “Grok AI”-ın GDPR üzrə əsas öhdəliklərinə riayət etməsini araşdırmaq üçün geniş miqyaslı istintaqa başlayıb.
Avropa Komissiyası da yanvarın 26-da “Grok”-un manipulyasiya olunmuş cinsi şəkillər və digər qanunsuz məzmun yayıb-yaymadığını qiymətləndirmək üçün araşdırma açmışdı. Eyni zamanda, fevralın 3-də Britaniyanın məxfilik üzrə nəzarət orqanı Grok-un şəxsi məlumatları emal etməsi və zərərli cinsi məzmun yaratmaq potensialı ilə bağlı rəsmi istintaq başladıb.
İlon Mask, Avropa İttifaqının onlayn məzmunu tənzimləyən qaydalarına etirazını ifadə etmiş və bu qaydaların ABŞ texnologiya şirkətlərinə tətbiqini vergi kimi qiymətləndirmişdi.
