İran hərbi qüvvələrinin təlimlərindən “Sizi səhrada gözləyirik” başlığı ilə yeni görüntülər yayılıb. Videoda müxtəlif ağır silahların, raket-artilleriya sistemlərinin və helikopterlərin tətbiqi nümayiş etdirilir.
MSNews.az xəbər verir ki, hərbi mövzular üzrə açıq mənbə məlumatlarını izləyən “War Noir” yayılan görüntülərdə İran istehsalı dördlüləli “Qatlinq” tipli sürətli atəş açan silah, Mi-17 helikopterləri, 106 millimetrlik M40A1 tipli təpməsiz top və 107 millimetrlik “Fəcr-1” yaylım atəşli raket sisteminin istifadə edildiyini bildirib.
Görüntülər sosial şəbəkələrdə də “We are waiting for you in the Desert” — “Sizi səhrada gözləyirik” ifadəsi ilə yayılıb. Bununla belə, MSNews.az açıq mənbələrdə videonun eyni başlıqla İran Silahlı Qüvvələrinin rəsmi internet resursunda ilkin paylaşımını müəyyən edə bilməyib. Buna görə ifadənin rəsmi hərbi bəyanat deyil, videonun təqdimat başlığı olduğu nəzərə alınmalıdır.
Videoda görünən “Fəcr-1” İranın arsenalında olan 107 millimetrlik yaylım atəşli raket sistemidir. Texniki mənbələr bu sistemi Çin mənşəli “Type 63” platformasının İran variantı kimi təsnif edir. M40 ailəsinə daxil olan 106 millimetrlik təpməsiz toplar da uzun müddətdir İranın hərbi arsenalında istifadə olunur.
İran daha əvvəl də hərbi təlimlər və manevrlər zamanı müxtəlif yerli və xarici mənşəli silah sistemlərini nümayiş etdirərək qüvvələrinin döyüş hazırlığını ön plana çıxarıb.
