İranda müğənni Parastu Əhmədi və onun yaradıcı komandasına qarşı sərt məhkəmə hökmü çıxarıldığı bildirilir.
MSNews.az xəbər verir ki, “IranWire” Qum əyalətinin Cinayət Məhkəməsinə istinadən yazır ki, Parastu Əhmədi və “Caravanserai Concert” layihəsində iştirak edən 8 musiqiçi və texniki heyət üzvü 74 şallaq cəzasına məhkum edilib.
Məlumata görə, sənətçilər “ictimai ədəbə qarşı açıq təhqir” ittihamı ilə cəzalandırılıblar. Hökm 2024-cü ilin dekabrında yayımlanan və sosial şəbəkələrdə milyonlarla baxış toplayan konsert videosu ilə bağlıdır. Həmin çıxış zamanı Əhmədi hicabsız səhnəyə çıxmışdı.
Parastu Əhmədi “From The Blood Of The Youth” adlı tanınmış vətənpərvər mahnını boş teatr məkanında ifa edib. Videonun YouTube-da 2,9 milyondan çox baxış topladığı bildirilir.
Hökm təkcə fiziki cəza ilə məhdudlaşmır. Məlumata görə, Əhmədi və onun komandasına 2 il müddətinə ölkədən çıxmaq və eyni müddət ərzində peşəkar yaradıcılıq fəaliyyəti ilə məşğul olmaq qadağan edilib.
“The Guardian” qeyd edir ki, İranın rəsmi məhkəmə xəbər agentliyi hökmü hələ dərc etməyib. Bununla belə, sənədləri görən hüquq müdafiəçiləri və vəkillər bu qərarın qadın sənətçilərə və mədəni etiraza qarşı təzyiqin bir hissəsi olduğunu bildirirlər.
Hüquq müdafiə təşkilatları hökmü əsassız və qəddar adlandırıblar. Onların fikrincə, qadınların mahnı oxuması və musiqi fəaliyyəti ilə məşğul olması cinayət hesab edilə bilməz.
İran qanunlarına əsasən, qadınların ictimai məkanda hicab taxması məcburidir. Eyni zamanda, qadınların solo şəkildə mahnı ifa etməsi də uzun illərdir ciddi məhdudiyyətlərlə üzləşir.
Bu hökm İranda qadın hüquqları, ifadə azadlığı və sənətçilərin fəaliyyəti ilə bağlı beynəlxalq narahatlığı yenidən gündəmə gətirib.
