İran Hörmüz boğazının tam açılması üçün ABŞ-yə bir sıra şərtlər irəli sürüb. Tehran Vaşinqtondan müharibəni və İran limanlarına tətbiq olunan dəniz blokadasını dayandırmağı, İranın dondurulmuş aktivlərini azad etməyi və region üzrə geniş atəşkəsə razılaşmağı tələb edir.
MSNews.az xəbər verir ki, İranın Ali Milli Təhlükəsizlik Şurasının katibi Möhsün Rezayi sosial şəbəkədə yaydığı bəyanatda ölkəsinin mövqeyinin dəyişmədiyini bildirib.
“İranın mesajı aydındır: ABŞ müharibəni və blokadanı dayandırmayana, İranın dondurulmuş aktivlərini azad etməyənə və Livanla Qəzza daxil olmaqla bütün regionda atəşkəsə razılaşmayana qədər Hörmüz boğazı yenidən açılmayacaq”, – Rezayi bildirib.
O əlavə edib ki, bütün şərtlər yerinə yetirilənədək boğaz bağlı qalacaq. “Reuters” də Rezayinin Vaşinqtonun şərtləri qəbul etməyəcəyi təqdirdə strateji su yolunun açılmayacağını bildirdiyini təsdiqləyib.
Rezayi avqustun 10-da İranın Ali Milli Təhlükəsizlik Şurasının yeni katibi təyin olunub. Keçmiş SEPAH komandanı İranın hazırkı rəhbərliyində əsas təhlükəsizlik fiqurlarından biri hesab olunur.
İranın tələbləri Vaşinqtonla Tehran arasında Hörmüz boğazının yenidən açılması üzrə vasitəçilər vasitəsilə aparılan danışıqlar fonunda səsləndirilib. “Reuters”in avqustun 12-də yaydığı məlumata görə, ABŞ və İran arasında iyunda əldə edilmiş müvəqqəti razılaşmanın bərpası istiqamətində hələlik irəliləyiş əldə olunmayıb.
Hörmüz boğazı dünya enerji ticarəti üçün strateji əhəmiyyət daşıyır. Hazırkı qarşıdurmada İran boğazdan keçidi məhdudlaşdırır, ABŞ isə İran limanlarına qarşı dəniz blokadası tətbiq edir. Tərəflərin qarşılıqlı şərtləri regiondakı gərginliyin azaldılması üzrə danışıqların əsas mübahisə mövzularından biri olaraq qalır.
