Azərbaycan Prezidenti İlham Əliyev oktyabrın 5-də Pirallahı Sənaye Parkında “Gen Pharma Caucasus Manufacturing Operations” MMC-nin dərman istehsalı müəssisəsinin açılışında iştirak edib. Yeni zavodun illik istehsal gücü 60 milyon qutu dərman, o cümlədən 2,5 milyard tablet və kapsul təşkil edir.
MSNews.az xəbər verir ki, iqtisadiyyat naziri Mikayıl Cabbarov dövlət başçısına Pirallahı Sənaye Parkı və ölkədə fəaliyyət göstərən sənaye zonaları barədə məlumat verib. Park 2016-cı ildə yaradılıb və əsas məqsədlərindən biri əczaçılıq məhsulları üzrə idxaldan asılılığın azaldılması, yerli istehsalın və məşğulluğun artırılmasıdır. Hazırda Pirallahı Sənaye Parkında 6 rezident qeydiyyatdan keçib.
Yeni müəssisənin təsisçiləri Türkiyənin “Gen İlaç ve Sağlık Ürünleri Sanayi A.Ş.” şirkəti — 66 faiz, Azərbaycan Biznesinin İnkişafı Fondu — 29 faiz və Türkiyənin “SİA Pharmaceuticals” şirkəti — 5 faiz payla iştirak edir. Layihənin ümumi dəyəri 113,9 milyon manatdır.
Layihənin maliyyələşdirilməsində özəl investisiya ilə yanaşı, Azərbaycan Biznesinin İnkişafı Fondunun 13,2 milyon manat investisiyası və 10 milyon manat güzəştli kredit vəsaiti istifadə olunub. Müəssisə sənaye parkının rezidenti kimi 7 milyon manatdan çox ƏDV və gömrük rüsumundan azad edilib.
5,2 hektar ərazini əhatə edən zavodda kardiologiya, nevrologiya, urologiya, diabetologiya, qastroenterologiya sahələri üzrə preparatlar, həmçinin ağrıkəsicilər, antibiotiklər və digər dərman vasitələri istehsal olunacaq. Müəssisədə 178 nəfərin daimi işlə təmin edilməsi nəzərdə tutulur.
Planlara əsasən, növbəti beş il ərzində 500-dən artıq preparatın istehsalının lokallaşdırılması və daxili bazarın tələbatının mümkün qədər yerli istehsal hesabına qarşılanması nəzərdə tutulur. Məhsulların Azərbaycan bazarı ilə yanaşı Özbəkistan, Qazaxıstan, Gürcüstan və digər ölkələrə ixracı planlaşdırılır.
Zavodda ABŞ, Yaponiya, Almaniya, İsveçrə, Çin, Danimarka, İsveç və Türkiyə istehsalı olan avadanlıqlar quraşdırılıb. Rəsmi məlumata görə, bu avadanlıqlar beynəlxalq standartlara uyğun dərman istehsalına imkan verir.
Müəssisədə Qarabağ Universiteti və Azərbaycan Tibb Universiteti üçün rəsmi tədris bazası da yaradılıb. Bu çərçivədə istehsalla yanaşı, əczaçılıq sahəsində təhsil və elmi əməkdaşlığın genişləndirilməsi nəzərdə tutulur.
Hazırda Azərbaycanda 8 sənaye parkı fəaliyyət göstərir. Bu il Naxçıvan Sənaye Parkının təməli qoyulub, Gəncə və Şəmkir ərazilərini əhatə edəcək Qərb Sənaye Parkının yaradılması istiqamətində isə layihələndirmə işləri aparılır.
