Azərbaycan Respublikasının Prezidenti İlham Əliyev iyulun 10-da maliyyə təhlükəsizliyi və iqtisadi cinayətkarlıqla mübarizə sahəsində fəaliyyət göstərən beynəlxalq qurumların nümayəndələrini qəbul edib.
MSNews.az xəbər verir ki, görüşdə Maliyyə Tədbirləri üzrə İşçi Qrupu — FATF və Çirkli Pulların Yuyulmasına və Terrorçuluğun Maliyyələşdirilməsinə Qarşı Mübarizə Tədbirlərinin Qiymətləndirilməsi üzrə Ekspertlər Komitəsinin prezidenti, Böyük Britaniyanın Maliyyə Nazirliyində İqtisadi Cinayətkarlıq və Sanksiyalar üzrə direktor Giles Tompson iştirak edib.
Qəbulda həmçinin Türk Dövlətləri Təşkilatının Baş katibi Kubanıçbek Ömüralıyev, Eqmont Qrupunun sədri, Polşanın Maliyyə Nazirliyinin Maliyyə Məlumatları Departamentinin direktor müavini Elzbieta Franko-Yaskeviç, Eqmont Qrupunun icraçı katibi, Fransanın Maliyyə Kəşfiyyat Orqanının Beynəlxalq əməkdaşlıq departamentinin direktor müavini Jerom Bomon da yer alıblar.
Bundan başqa, MONEYVAL Komitəsinin prezidenti, San Marinonun Maliyyə Kəşfiyyat Orqanının direktoru Nikolla Muçiolli, Eqmont Qrupunun sədr müavini, Almaniyanın Maliyyə Kəşfiyyat Orqanının rəhbəri Daniel Telesklaf və Eqmont Qrupunun sədr müavini, Səudiyyə Ərəbistanının Maliyyə Kəşfiyyat Orqanının rəhbəri Məhəmməd bin Əbdülrahman Almuhanna da görüşdə iştirak ediblər.
Söhbət zamanı Azərbaycanın Eqmont Qrupunun illik plenar sessiyasına ev sahibliyi etdiyi vurğulanıb. Tədbirin yüksək səviyyədə təşkil olunduğu, sessiya çərçivəsində səmərəli müzakirələrin aparıldığı qeyd edilib.
Görüşdə Azərbaycanla nümayəndə heyətinə daxil olan qurumlar arasında uğurlu əməkdaşlığın həyata keçirildiyi bildirilib. Tərəflər mövcud tərəfdaşlığın daha da genişləndirilməsi imkanları ətrafında fikir mübadiləsi aparıblar.
Eyni zamanda, Azərbaycanda çirkli pulların yuyulması və terrorçuluğun maliyyələşdirilməsinə qarşı mübarizə sahəsində ardıcıl tədbirlərin görüldüyü, bu istiqamətdə mühüm nailiyyətlərin əldə edildiyi vurğulanıb.
Görüş beynəlxalq maliyyə şəffaflığı, iqtisadi cinayətkarlıqla mübarizə və maliyyə kəşfiyyatı sahəsində Azərbaycanın tərəfdaş qurumlarla əməkdaşlığının inkişafı baxımından əhəmiyyətli hadisə kimi qiymətləndirilir.
