Mayın 10-u müasir müstəqil Azərbaycan dövlətinin memarı və qurucusu, Ümummilli Lider Heydər Əliyevin anadan olmasının 103-cü ildönümüdür. Bu münasibətlə Azərbaycan Respublikasının Prezidenti İlham Əliyev və birinci xanım Mehriban Əliyeva mayın 9-da Fəxri xiyabanda Ulu Öndərin məzarını ziyarət ediblər. Bu barədə Prezidentin rəsmi saytı məlumat yayıb.
Dövlət başçısı Heydər Əliyevin məzarı önünə əklil qoyub, Ulu Öndərin xatirəsini ehtiramla yad edib. Birinci xanım Mehriban Əliyeva da Ümummilli Liderin xatirəsini dərin hörmətlə anıb. Mərasim zamanı Azərbaycan Respublikasının Dövlət Himni səsləndirilib.
Prezident İlham Əliyev və birinci xanım Mehriban Əliyeva daha sonra Ulu Öndər Heydər Əliyevin ömür-gün yoldaşı, görkəmli oftalmoloq-alim, akademik Zərifə xanım Əliyevanın məzarını ziyarət edərək üzərinə gül dəstələri qoyublar. Həmçinin tanınmış dövlət xadimi Əziz Əliyevin və professor Tamerlan Əliyevin xatirələri də ehtiramla yad olunub.
Heydər Əliyevin anadan olmasının ildönümü hər il Azərbaycanda dövlət səviyyəsində qeyd olunur. Ulu Öndərin adı ölkənin müstəqilliyinin möhkəmləndirilməsi, dövlətçilik institutlarının formalaşdırılması və müasir Azərbaycanın inkişaf strategiyasının əsaslarının qoyulması ilə bağlıdır.
