Fransada Paris yaxınlığındakı One-su-Bua (Aulnay-sous-Bois) şəhərində yerləşən Ət-Təqva məscidi radikal ideologiyanın təbliği və zorakılığa çağırışlarla bağlı ittihamlar əsasında altı ay müddətinə bağlanıb. Məscid rəhbərliyi isə qərarın dini azadlıqları pozduğunu bildirərək məhkəməyə müraciət edib.
MSNews.az xəbər verir ki, Sena-Sen-Deni prefekturasının iyulun 27-də qəbul etdiyi qərar avqustun 7-də Montröy İnzibati Məhkəməsi tərəfindən qüvvədə saxlanılıb.
Bu barədə “Anadolu Agentliyi” və “Le Parisien” məlumat yayıb.
Fransa hakimiyyətinin iddiasına görə, məsciddə fəaliyyət göstərən bəzi imamların xütbələri və sosial şəbəkə paylaşımları zorakılığa, dini nifrətə və ayrı-seçkiliyə çağırış xarakteri daşıyıb. Rəsmilər müəyyən çıxışlarda cihadın əsaslandırıldığını və şəhidliyin təbliğ edildiyini bildiriblər.
Məscidin hüquqlarını müdafiə edən vəkil Rafik Şekkat isə ittihamları rədd edib. Onun sözlərinə görə, qərarın əsaslandırılmasında Qurandan yeddi hissəyə, eləcə də klassik islam alimlərinin əsərlərinə istinad olunub.
Vəkil həmin dini mətnlərin kontekstdən çıxarıldığını, onların birbaşa zorakılığa çağırış kimi qiymətləndirilməsinin düzgün olmadığını bildirib.
“Middle East Forum” nəşrinin məlumatına görə, Şekkat imamların Qurandan ayələr gətirməsinin məscidin bağlanmasına əsas kimi istifadə olunmasını tənqid edib. O, belə yanaşmanın Fransada dini etiqad və ifadə azadlığı baxımından təhlükəli presedent yarada biləcəyini vurğulayıb.
Hakim məscid rəhbərliyinin gördüyü düzəldici tədbirləri kifayət hesab etməyərək bağlanma qərarının təcili qaydada dayandırılması tələbini rədd edib.
Hadisə Fransada dini etiqad azadlığının sərhədləri, radikalizmlə mübarizə tədbirləri və dövlətin dini məzmunlu çıxışlara müdaxilə imkanları barədə müzakirələri yenidən gündəmə gətirib.
