Beynəlxalq Futbol Federasiyası – FIFA – 2026-cı il FIFA Dünya Kuboku turnirində tətbiq ediləcək futbol qaydalarında bir sıra mühüm dəyişiklikləri rəsmi olaraq təsdiqləyib.
MSNews.az-ın qurumun rəsmi saytına istinadən yaydığı məlumata görə, bu islahatların əsas məqsədi oyunun tempini artırmaq və vaxtın qəsdən uzadılması taktikasını minimuma endirməkdir. Yeni qaydalar komandaları daha dinamik oynamağa məcbur etməklə yanaşı, matç zamanı vaxt itkisini də aradan qaldırmağa yönəlib.
Təsdiqlənən əsas dəyişikliklər
1. Sərt əvəzetmə limiti – 10 saniyə qaydası
Əvəz olunan futbolçu meydanı tərk etmək üçün maksimum 10 saniyə vaxt əldə edəcək. Əgər oyunçu bu müddəti aşarsa, onu əvəz edən futbolçu 1 dəqiqə meydandan kənarda gözləməli olacaq. Bu halda komanda həmin müddətdə az sayda oyunçu ilə oynayacaq.
2. Topun oyuna daxil edilməsi üçün 5 saniyə
Oyunçulara topu oyuna daxil etmək və ya qapıdan zərbə vurmaq üçün 5 saniyə vaxt veriləcək. Bu müddət ərzində top oyuna qaytarılmasa, topa sahiblik avtomatik olaraq rəqib komandaya keçəcək.
3. Tibbi müdaxilə ilə bağlı yeni qayda
Meydanda tibbi yardım alan futbolçular dərhal meydanı tərk etməlidirlər. Oyun davam etdikdən sonra onlar yalnız 1 dəqiqəlik gözləmə müddətindən sonra meydançaya qayıda biləcəklər.
4. VAR səlahiyyətlərinin genişləndirilməsi
Video Köməkçi Hakim (VAR) sistemi daha geniş səlahiyyətlər əldə edəcək. VAR hakimləri artıq ikinci sarı vərəqə epizodlarını və əsas hakimin açıq-aşkar səhv etdiyi hallarda künc zərbəsi qərarlarını da nəzərdən keçirə biləcəklər.
Ekspertlərin fikrincə, bu dəyişikliklər bir çox komandanın taktiki yanaşmasını dəyişdirəcək və 2026 Dünya Kubokunun turnir tarixində ən dinamik və gərgin yarışlardan birinə çevrilməsinə səbəb ola bilər.
