Arut Sasunyanın “The California Courier”-də yayımlanan məlumatına görə, 2025-ci ilin oktyabr ayında Ermənistanda aparılmış geniş miqyaslı sorğunun nəticələri ölkədə Baş nazir Nikol Paşinyanın dəstək göstəricilərində ciddi azalma olduğunu ortaya qoyub. 2018-ci ildə hakimiyyətə gəldiyi zaman 82% olan Paşinyanın reytinqi hazırda təxminən 10%-ə enib.
“Arar” Sivilizasiya Araşdırmaları Fondu tərəfindən 5–25 oktyabr tarixlərində aparılan sorğu 18–80 yaş və daha yuxarı yaşdakı vətəndaşlar arasında həyata keçirilib və səhv payı ±2,92% olaraq müəyyən olunub. Sorğu iştirakçılarına ailələrinin iqtisadi vəziyyəti ilə bağlı suallar da verilib. Məlum olub ki, respondentlərin 12,7%-i öz ailələrini kasıb və ya çox kasıb hesab edir, 30,3%-i orta səviyyədən aşağı, 49,7%-i isə orta səviyyədən yuxarı olduğunu bildirir. Yalnız 6,2% respondent öz ailələrinin vəziyyətini yaxşı və ya çox yaxşı qiymətləndirib.
Sorğuda həmçinin dövlət institutlarına etimad səviyyəsi ölçülüb. Milli Assambleya, Silahlı Qüvvələr, Polis və Hökumət daxil olmaqla bir sıra qurumlarda məmnuniyyət göstəriciləri fərqli olsa da, ümumilikdə Paşinyanın rəhbərlik etdiyi hökumətə qarşı narazılıq yüksək səviyyədə qalır. Ermənistan Apostol Kilsəsi isə vətəndaşlar arasında nisbətən yüksək etimad qazanıb.
Xarici siyasətə qiymətləndirmələr göstərir ki, respondentlərin 42,9%-i hökumətin xarici siyasətini düzgün hesab edərkən, 51,8%-i bunun əksini düşünür. Daxili siyasətə münasibətdə isə düzgün hesab edənlərin sayı 34,5%, yanlış hesab edənlərin sayı isə 62,7% təşkil edir. Əvvəlki illərlə müqayisədə, fikirsiz və ya cavab verməyən respondentlərin payı isə əhəmiyyətli dərəcədə azalıb.
Azərbaycanla sülhün mümkünlüyü ilə bağlı suallara verilən cavablar isə Paşinyan üçün daha da çətin vəziyyəti göstərir. Uzunmüddətli sülhün mümkün olduğunu düşünənlərin sayı 30,5% olsa da, 69,2% respondent bunun mümkün olmadığını bildirib. Donald Tramp vasitəsilə əldə ediləcək sülh müqaviləsinin real sülh gətirəcəyini düşünənlərin sayı isə yalnız 33,7% təşkil edir.
Hərbi məsələlər də əhalinin diqqətindədir. Respondentlərin 80,2%-i hərbi büdcənin və əsgər sayının azaldılmasına qarşıdır, 64%-i isə Rusiya hərbi bazasının bağlanmasına etiraz edir. Əvvəlki erməni liderlərin hakimiyyətə qayıtmasına dəstək verənlər isə yalnız 18,3% təşkil edir. Yeni konstitusiya qəbul edilməsi, xüsusilə, Azərbaycanla ilə sülh müqaviləsi üçün zəruri bir addım olaraq qiymətləndirilən məsələ, əksər vətəndaşlar tərəfindən dəstəklənmir. Bu baxımdan Paşinyanın Əliyevin imzasını əldə etmək cəhdi ciddi çətinliklərlə üzləşir.
Respondentlərin böyük əksəriyyəti, 91,3%-i, Əliyev tərəfindən təklif edilən konstitusiya dəyişikliklərinə qarşı çıxır. Azərbaycanla sülh mövzusunda Paşinyanın ümid etdiyi dəstəyin əksinə, əhali onun təşəbbüslərinə şübhə ilə yanaşır. Sorğu həmçinin Azərbaycanın uzunmüddətli məqsədləri ilə bağlı düşüncələri də əks etdirib: respondentlərin 48,5%-i Azərbaycanın məqsədinin Ermənistanı tamamilə məhv etmək olduğunu düşünür, yalnız 17,4% isə sülh və iqtisadi əməkdaşlıq perspektivinə inanır.
Hərbi ittifaqlar məsələsində respondentlərin əksəriyyəti Rusiyanı tərəfdaş kimi görür (37,8%), ABŞ isə 18,3% dəstək alır. Avropa Birliyi ölkələrinə və İrana inam azalır, Türkiyə isə cüzi dəstək alır (0,5%). Bu nəticələr, Paşinyanın Azərbaycanla sülh təşəbbüslərini həyata keçirmək və parlament seçkilərində mövqeyini qorumaq üçün ciddi çətinliklər qarşısında olduğunu göstərir.
Sorğunun nəticələri aydın şəkildə göstərir ki, əksər ermənilər Paşinyanın Azərbaycanla münasibətlərin normallaşdırılması üzrə strategiyasına inanmır və ölkədə daxili siyasi gərginliyin artması ehtimalı yüksəkdir.
