Çində hazırlanmış maqnit yastıqlı eksperimental platforma cəmi 5,3 saniyəyə sıfırdan saatda 800 kilometr sürət yığaraq eyni tipli sistemlər üzrə dünya rekordunu yeniləyib. Sınaq Hubei əyalətindəki Donghu Laboratory-nin 1 kilometrlik maqlev xəttində həyata keçirilib.
MSNews.az xəbər verir ki, “The Independent” avqustun 13-də bu texnoloji nailiyyət barədə məlumat yayıb. Bununla belə, rekordun özü yeni deyil: Hubei əyalətinin rəsmi məlumatına əsasən, sınaq 2025-ci ilin dekabrında keçirilib. Təxminən 1110 kiloqram ağırlığında olan yüksək sürətli qatar modeli elektromaqnit hərəkətverici sistem vasitəsilə 800 km/saat həddinə çatdırılıb.
Sınağın digər mühüm hissəsi əyləc sistemi olub. Rəsmi məlumata görə, platforma yüksək sürətdən 200 metr daxilində idarə olunan şəkildə dayandırılıb. Bunun üçün relsin maqnit müqaviməti ilə elektromaqnit əyləcləmə birlikdə istifadə edilib, yerləşdirmə dəqiqliyinin isə millimetr səviyyəsinə çatdığı bildirilib.
Donghu Laboratory bu nəticə ilə altı ay ərzində qısaməsafəli maqlev sürətlənməsi üzrə üçüncü dəfə eyni tipli platformaların rekordunu yeniləyib. İlk açıq sınaqda, 2025-ci ilin iyununda sistem saatda 650 kilometr sürətə çatmışdı.
Hazırkı platforma sərnişin daşımaq üçün nəzərdə tutulmayıb. “The Independent” yazır ki, sınaqlardan əldə olunan texnologiyaların gələcəkdə yeni nəsil yüksək sürətli maqlev nəqliyyatında, eləcə də raket və hərbi təyyarələr üçün elektromaqnit buraxılış sistemlərində istifadə olunması nəzərdən keçirilir.
Bu səbəbdən qurğunu hazırda istifadəyə hazır “800 km/saatlıq sərnişin qatarı” kimi təqdim etmək düzgün deyil. Söhbət yüksək sürətli elektromaqnit hərəkət, levitasiya və əyləcləmə texnologiyalarının sınağı üçün yaradılmış eksperimental modeldən gedir.
