ABŞ-da milyarder Ceffri Epştenə aid yeni açıqlanan sənədlərdə texnologiya dünyasının tanınmış liderlərinin adları yer alıb. Epşteyn, ABŞ-da qız uşaqlarına qarşı fahişəlik şəbəkəsi qurmaq ittihamı ilə həbsdə olarkən ölmüşdü. ABŞ Ədliyyə Nazirliyi tərəfindən yayımlanan sənədlərdə “X” platformasının sahibi və “Tesla”-nın CEO-su İlon Mask, “Microsoft”-un qurucusu Bill Qeyts, “LinkedIn”-in yaradıcısı Reid Hoffman, “Google”-un qurucuları Sergey Brin və Larri Peyc, “Virgin Group”-un rəhbəri Riçard Brenson və “Amazon”-un təsisçisi Ceff Bezos kimi şəxslərin adları keçir.
Sənədlərdə, İlon Maskın Epşteynə aid Karib adalarına səyahət üçün yazışmalar etdiyi, lakin özü tərəfindən adaya getmədiyi qeyd olunur. Mask bildirib ki, Epşteyn onu adasına getməyə dəvət edib, lakin o, bunu rədd edib. Sənədlərdə Reid Hoffman ilə qarşılıqlı yazışmalar da yer alıb, hər iki tərəf Epşteyn adasında baş verən partiyalara dair bir-birini ittiham edib.
Bill Qeyts ilə bağlı sənədlərdə, onun düşüncə mərkəzi “bgc3” çərçivəsində həyata keçirilən və Epşteynə göndərilən 5 layihə arasında “pandemiya simulyasiyası” layihəsinin də olduğu göstərilib. Qeytsin sözçüsü “BBC”-yə bildirib ki, bu iddialar əsassızdır və Qeytsin hər hansı bir cinayətdə iştirakı yoxdur.
“Google”-un qurucuları Brin və Peyc sənədlərdə Epşteynin maliyyə şəbəkəsi və “JP Morgan Chase” bankı ilə əlaqələri çərçivəsində qeyd olunub. Riçard Brensonun 2013-cü ildə Epşteyn adasına dəvətində “Hərəmini də gətirməlisən” ifadəsi yer alıb, lakin Brensonun nümayəndələri bunu zarafat kimi qiymətləndirib. Ceff Bezosun adı da sənədlərdə var, eyni zamanda keçmiş prezident Bill Klintonun da iştirak etdiyi qeyd olunub.
Bu sənədlər texnologiya dünyasında bir çox tanınmış şəxslə bağlı iddialar və şübhələrə işıq salır, lakin bəzi şəxslər bütün ittihamları rədd edib.
