Cənubi Afrika millisinin və “Mamelodi Sundowns” klubunun yarımmüdafiəçisi Ceyden Adams 25 yaşında vəfat edib.
MSNews.az xəbər verir ki, futbolçunun ölümünü “Mamelodi Sundowns” rəsmi şəkildə təsdiqləyib. Klub açıqlamasında Adamsın ailəsinə və yaxınlarına başsağlığı verib, yas dövründə onların şəxsi həyatına hörmət göstərilməsini istəyib.
“Reuters” yazır ki, ölüm səbəbi hələlik açıqlanmayıb. Ceyden Adams 2026-cı il dünya çempionatında Cənubi Afrika millisinin üç qrup oyununda iştirak edib. O, Meksika və Çexiyaya qarşı görüşlərə start heyətində başlayıb, Cənubi Koreya üzərində qələbə qazandıqları matçda isə sonradan meydana çıxıb.
Cənubi Afrika həmin qələbə ilə tarixində ilk dəfə dünya çempionatının pley-off mərhələsinə yüksəlib. Komanda 1/16 finalda Kanadaya məğlub olaraq turnirlə vidalaşıb.
Adams klub səviyyəsində “Mamelodi Sundowns”un formasını geyinirdi. O, daha əvvəl “Stellenbosch” klubunda çıxış edib və 2025-ci ilin əvvəlində Pretoria təmsilçisinə qoşulub. Futbolçu 2025/2026 mövsümündə komandası ilə Afrika Çempionlar Liqasının qalibi olub.
Cənubi Afrika Prezidenti Siril Ramafosa da futbolçunun vəfatı ilə bağlı başsağlığı verib. Prezident Adamsın ölkə futboluna sevinc və qələbələr bəxş etdiyini, Cənubi Afrikanın adını beynəlxalq arenada yüksəklərə qaldırdığını bildirib.
