Xorvatiya millisi DÇ-2026-nın “L” qrupunun son turunda Qananı 2:1 hesabı ilə məğlub edərək pley-off mərhələsinə yüksəlib.
MSNews.az xəbər verir ki, qarşılaşma ABŞ-ın Filadelfiya şəhərindəki “Philadelphia Stadium”da keçirilib. Xorvatiya bu qələbədən sonra “L” qrupunu ikinci pillədə tamamlayıb.
Oyunda hesabı 31-ci dəqiqədə Petar Suçiç açıb. Xorvatiya ilk hissəni 1:0 üstün başa vurub. İkinci hissədə Qana fəallığını artırıb və 73-cü dəqiqədə Derrik Lukkassen hesabı bərabərləşdirib. Qol epizodu VAR yoxlamasından sonra təsdiqlənib.
Matçın həlledici anı 83-cü dəqiqədə yaşanıb. Luka Modriçin künc zərbəsindən ötürməsindən sonra Nikola Vlaşiç başla fərqlənərək Xorvatiyanı yenidən önə keçirib. Bu qol oyunda yekun nəticəni müəyyənləşdirib — 2:1.
Xorvatiya yığmasının baş məşqçisi Zlatko Daliç oyundan sonra komandasının çətin başlanğıcdan sonra əvvəlki səviyyəsinə qayıtdığını bildirib. Nəşr Luka Modriçin də bu matçda diqqət mərkəzində olduğunu qeyd edib. Təcrübəli yarımmüdafiəçi qələbə qolunun ötürməsini verərək Dünya Kuboku tarixində məhsuldar ötürmə edən ən yaşlı futbolçulardan biri kimi yadda qalıb.
Bu nəticədən sonra “L” qrupunda İngiltərə 7 xalla lider olub. Xorvatiya 6 xalla ikinci, Qana isə 4 xalla üçüncü yeri tutub. Panama qrup mərhələsini xalsız başa vurub. Xorvatiya 1/32 finalda Portuqaliya ilə qarşılaşacaq. Qana isə qrup üçüncüsü kimi pley-offa vəsiqə qazanıb və növbəti mərhələdə Kolumbiya ilə üz-üzə gələcək.
