ABŞ-ın məşhur aktyoru, döyüş sənətləri ustası Çak Norris 86 yaşında vəfat edib. Bu barədə onun ailəsi sosial şəbəkə vasitəsilə açıqlama yayıb.
Ailə üzvlərinin bildirdiyinə görə, Norris həyatının son anlarını ailəsinin əhatəsində və sakit şəkildə keçirib. Ölüm səbəbi ilə bağlı detallı məlumat açıqlanmayıb.
Çak Norris 1980-ci illərin ən məşhur aksiya filmlərinin ulduzlarından biri olub. O, “Code of Silence”, “Missing in Action”, “The Delta Force” kimi filmlərdə rol alaraq geniş populyarlıq qazanıb. Onun ən yadda qalan obrazlarından biri isə Walker, Texas Ranger serialında canlandırdığı Kordell Uoker obrazıdır.
Norris karyerasına peşəkar döyüş sənətçisi kimi başlayıb və 6 dəfə məğlubedilməz dünya karate çempionu olub. O, 1973-cü ildə “The Way of the Dragon” filmində Bryus Li ilə döyüş səhnəsi ilə kino dünyasına daxil olub.
Aktyor daha sonra “The Expendables 2” filmində də rol alaraq yeni nəsil tamaşaçılar arasında da tanınıb.
2000-ci illərdə isə o, internet fenomeninə çevrilib. “Chuck Norris facts” kimi tanınan zarafatlar onun sərt və güclü obrazını simvolik şəkildə populyarlaşdırıb.
1940-cı ildə ABŞ-da doğulan Norris gənclik illərində ABŞ Hərbi Hava Qüvvələrində xidmət edib və məhz, bu dövrdə döyüş sənətlərinə maraq göstərməyə başlayıb. Daha sonra o, öz döyüş sistemi olan “Chun Kuk Do”-nu yaradıb və gənclər üçün müxtəlif sosial layihələr həyata keçirib.
Çak Norris təkcə aktyor kimi deyil, həm də yazıçı, prodüser və ictimai fəal kimi tanınıb. O, həyat fəlsəfəsi, özünü inkişaf və döyüş sənətləri ilə bağlı bir sıra kitabların müəllifi olub.
Onun vəfatı dünya kino və idman ictimaiyyəti tərəfindən böyük itki kimi qiymətləndirilir.
