2015-ci ildə rinqdə aldığı ağır beyin travmasından sonra uzun illər ciddi sağlamlıq problemləri ilə yaşayan puerto-rikolu keçmiş boksçu Priçard Kolon 33 yaşında vəfat edib. Onun ölümünü atası Riçard Kolon avqustun 13-də sosial şəbəkə vasitəsilə təsdiqləyib.
MSNews.az xəbər verir ki, “ABC News” və “Sky Sports” Kolonun ölümünün 2015-ci ildə karyerasını başa vuran faciəvi döyüşdən təxminən 11 il sonra baş verdiyini bildirir.
Kolon 17 oktyabr 2015-ci ildə ABŞ-ın Virciniya ştatında Terrel Uilyamsla qarşılaşıb. Döyüşə qədər o, peşəkar karyerasında 16 görüşün hamısında qalib gəlmiş, 13 qələbəni nokautla başa vurmuşdu. Uilyamsla qarşılaşma isə onun 17-ci və sonuncu peşəkar döyüşü olub.
Döyüş zamanı Uilyams Kolonun başının arxa hissəsinə zərbələr endirib. Boksda qadağan olunan belə zərbələrdən birinə görə referi yeddinci raundda Uilyamsdan bir xal silib. Kolon qarşılaşma ərzində bu zərbələrlə bağlı hakimə şikayət etmişdi. Doqquzuncu raunddan sonra onun küncü səhvən döyüşün başa çatdığını düşünərək əlcəklərini çıxarıb və Kolon diskvalifikasiya olunub.
Bir müddət sonra Kolonun vəziyyəti kəskin pisləşib. O, başgicəllənməsindən şikayət edib, qusub və huşunu itirib. Xəstəxanada ona beyində qanaxma — subdural hematoma diaqnozu qoyulub və təcili əməliyyat keçirilib. Kolon 221 gün komada qalıb.
Sonrakı illərdə o, ailəsinin daimi qayğısı və uzunmüddətli reabilitasiya ilə yaşayıb. 2019-cu ilə qədər Kolon üz hərəkətləri, səslər və göz hərəkətlərini izləyən kompüter vasitəsilə müəyyən ünsiyyət qurmaq qabiliyyəti əldə etmişdi.
Kolonun ölümündən sonra Dünya Boks Təşkilatı (WBO) və Dünya Boks Şurası (WBC) onun xatirəsini yad edib. WBO prezidenti Qustavo Olivieri Kolonun həyatını cəsarət, dözümlülük və mübarizə ruhu ilə xarakterizə edib.
