Belçika millisi 2026-cı il dünya çempionatının 1/16 finalında Seneqalı dramatik oyundan sonra 3:2 hesabı ilə məğlub edib.
MSNews.az xəbər verir ki, “Seattle Stadium”-da keçirilən qarşılaşmada Belçika 0:2 geridən qayıdaraq növbəti mərhələyə yüksəlib.
Seneqal oyuna daha inamlı başlayıb. Afrika təmsilçisi Habib Diarranın birinci hissədə vurduğu qolla hesabı açıb.
İkinci hissədə İsmaila Sarr fərqlənərək Seneqalın üstünlüyünü iki topa çatdırıb. Bu qol Belçikanı çox çətin vəziyyətə salıb və matçın son dəqiqələrinə qədər Seneqal sensasiyaya yaxın görünürdü.
Lakin Belçika oyunun sonlarında inanılmaz dönüş edib. Əvvəlcə Romelu Lukaku 86-cı dəqiqədə fərqi azaldıb.
Ardınca Yuri Tilemans hesabı bərabərləşdirərək oyunu əlavə vaxta aparıb. Belçika bununla son dəqiqələrdə məğlubiyyətdən xilas olub.
Əlavə vaxtda da gərgin mübarizə davam edib. Matç penaltilər seriyasına doğru getsə də, əlavə vaxtın sonlarında VAR müdaxiləsindən sonra Belçikanın xeyrinə penalti təyin olunub.
Yuri Tilemans zərbəni dəqiq yerinə yetirib və Belçikaya 3:2 hesablı dramatik qələbə qazandırıb.
Tilemansın 125-ci dəqiqədə vurduğu qol dünya çempionatları tarixində ən gec qeydə alınan qollardan biri kimi yadda qalıb.
Seneqal futbolçuları və məşqçi heyəti penalti qərarına etiraz etsə də, hakim VAR yoxlamasından sonra qərarını qüvvədə saxlayıb.
Bu nəticə Belçika üçün 2018-ci il dünya çempionatında Yaponiyaya qarşı 0:2-dən dönüşü xatırladıb. “Qırmızı şeytanlar” yenə pley-offda böyük geri dönüşlə mərhələ adlayıblar.
Seneqal isə turnirlə çox ağrılı şəkildə vidalaşıb. Komanda 85-ci dəqiqəyə qədər iki top fərqi ilə öndə olsa da, üstünlüyünü qoruya bilməyib.
Belçika 1/8 finalda ABŞ millisi ilə qarşılaşacaq.
