Avstriya millisi 2026 FIFA Dünya Kubokuna qələbə ilə başlayıb.
MSNews.az xəbər verir ki, “J” qrupunun ilk turunda keçirilən Avstriya – İordaniya qarşılaşması Avstriyanın 3:1 hesablı qələbəsi ilə başa çatıb. Oyun ABŞ-ın Kaliforniya ştatındakı Santa-Klara şəhərində, San Francisco Bay Area Stadiumda keçirilib.
Bu qarşılaşma Avstriyanın 28 illik fasilədən sonra Dünya Kubokuna qayıdışı, İordaniyanın isə turnirdə ilk oyunu olub.
Avstriya hesabı 20-ci dəqiqədə Romano Şmidin uzaq məsafədən vurduğu gözəl qolla açıb. İlk hissə Avstriyanın 1:0 hesablı üstünlüyü ilə başa çatıb.
İkinci hissəyə İordaniya daha fəal başlayıb. 50-ci dəqiqədə Ali Olvan fərdi reydini dəqiq zərbə ilə tamamlayaraq hesabı bərabərləşdirib. Bu qol İordaniyanın Dünya Kuboku tarixində ilk qolu kimi yadda qalıb.
Avstriya 77-ci dəqiqədə yenidən önə keçib. Künc zərbəsindən sonra top İordaniya müdafiəçisi Yazan Al-Araba dəyərək qapıya daxil olub və hesab 2:1 olub.
Matçın sonlarında Avstriya üstünlüyünü qoruyub. Əlavə vaxtda Marko Arnautovic penaltidən fərqlənərək yekun hesabı müəyyənləşdirib — 3:1.
Avstriya qələbə sayəsində “J” qrupunda ilk 3 xalını qazanıb. Qrupun digər oyununda Argentina Əlcəzairi 3:0 hesabı ilə məğlub edib.
Bu nəticədən sonra Argentina və Avstriya “J” qrupunda ilk turu qələbə ilə başa vurublar. İordaniya isə debüt oyununda məğlub olsa da, Ali Olvanın tarixi qolu ilə mundial tarixində ilk dəfə fərqlənib.
