Pakistan ordusunun qərargah rəisi feldmarşal Asim Munirin İrana planlaşdırılan səfəri təxirə salınıb. Bu barədə “Al Arabiya” telekanalı yüksək vəzifəli anonim mənbəyə istinadən məlumat yayıb. Məlumatda səfərin niyə baş tutmadığına dair rəsmi səbəb açıqlanmayıb.
Munirin Tehrana səfəri ABŞ və İran arasında Pakistan vasitəçiliyi ilə aparıldığı bildirilən danışıqlar fonunda gözlənilirdi. Daha əvvəl “Al Arabiya” mənbələri bildirmişdi ki, tərəflər Vaşinqton və Tehran arasında mümkün razılaşma mətninin yekunlaşdırılması üzərində işləyirlər və Pakistan ordusunun rəhbəri bu proses çərçivəsində İrana gedə bilər.
İranlı jurnalist Əli Qolhaki səfərin təxirə salınmasını “mühüm siqnal” kimi qiymətləndirib. Onun fikrincə, ABŞ hazırkı mərhələdə İranın nüvə proqramı ilə bağlı danışıqların aparılmasını, məsələnin bağlanmasını və Tehranın nüvə fəaliyyəti üzərində sərt nəzarət mexanizminin qurulmasını istəyir.
Qolhakinin şərhinə görə, Tehran isə nüvə məsələsi üzrə danışıqları yalnız müharibənin başa çatması, dəniz blokadasının qaldırılması və 30 günlük etimadın möhkəmləndirilməsi mərhələsindən sonra mümkün hesab edir. O həmçinin bildirib ki, ABŞ İranın Hörmüz boğazı üzərində müəyyən idarəçilik rolunu qəbul etsə də, Tehranın boğazdan keçid üçün rüsum tətbiq etməsi ilə razılaşmağa hazır deyil.
Pakistan son aylarda ABŞ və İran arasında vasitəçi rolunda çıxış edir. Pakistan İranın yenilənmiş təklifini ABŞ tərəfinə çatdırıb və müzakirələrdə əsas mövzular arasında atəşkəs, Hörmüz boğazı, sanksiyalar və İranın neft ixracının bərpası kimi məsələlər yer alıb.
Hazırda Asim Munirin səfərinin tamamilə ləğv edildiyi, yoxsa daha sonrakı tarixə keçirildiyi rəsmi şəkildə açıqlanmayıb. Nə Pakistan, nə də İran tərəfi “Al Arabiya”nın məlumatını hələlik rəsmi şəkildə təsdiqləyib.
