Dünya qadın tennis reytinqinin lideri Arina Sabalenka “TIME” jurnalının üz qabığında yer alıb. Belarus mediası və bir sıra xarici nəşrlər bununla onun “TIME”ın üz qabığına çıxan ilk belarus olduğunu bildirir.
MSNews.az xəbər verir ki, “TIME” üçün geniş müsahibə verən 28 yaşlı tennisçi karyerası, şəxsi həyatı və sosial şəbəkələrdə üzləşdiyi tənqidlərdən danışıb. Sabalenkanın “TikTok” və “Instagram”-da ümumilikdə təxminən 7,2 milyon izləyicisi var və o, sosial mediada aktiv olmağın yarışların yaratdığı psixoloji gərginlikdən uzaqlaşmasına kömək etdiyini deyib.
Tennisçi xüsusilə “daha çox tennis, daha az TikTok” kimi şərhlərə münasibət bildirib. Sabalenkanın sözlərinə görə, bəzən onu tənqid edən şəxslərin profillərinə daxil olaraq onların həyatlarının nə qədər “ideal” olduğunu yoxlayır.
“Bəzən onların profilinə girib nə qədər mükəmməl olduqlarına baxıram. Sonra düşünürəm: ‘Dostum, başqalarının həyatına qarışmazdan əvvəl öz problemlərini həll et’”, – Sabalenka “TIME” jurnalına bildirib.
O, rəqs etməyin, video çəkməyin və paylaşım hazırlamağın bəzən 30-60 dəqiqə ərzində tennis və digər problemlər barədə düşünməməsinə imkan verdiyini, bunu kiçik bir “qaçış” kimi gördüyünü qeyd edib.
Sabalenka hazırda WTA-nın rəsmi reytinqində 8 670 xalla dünyanın bir nömrəli qadın tennisçisidir. O, eyni zamanda qadın tennis tarixində dünya reytinqinin zirvəsində ən azı 100 həftə qalan cəmi 10 oyunçudan biridir.
