ABŞ-ın vitse-prezidenti Cey Di Vensin yaxın günlərdə Macarıstana səfər etməyi planlaşdırdığı bildirilir. Mənbələrə görə, bu səfər ölkənin baş naziri Viktor Orbana seçkilər ərəfəsində siyasi dəstək nümayişi kimi qiymətləndirilir.
“Reuters”in məlumatına əsasən, səfərin dəqiq vaxtı hələ açıqlanmayıb və planlar dəyişə bilər. Bildirilir ki, ABŞ administrasiyası İran ətrafında davam edən hərbi gərginlik səbəbindən yüksək səviyyəli rəsmilərin Vaşinqtonda qalmasına üstünlük verə bilər.
Qeyd edək ki, ABŞ dövlət katibi Marko Rubio fevral ayında Budapeştə səfər edərək Orban hökumətinə açıq dəstək vermişdi. ABŞ Prezidenti Donald Tramp da daha əvvəl Orbanı “güclü lider” kimi xarakterizə etmişdi.
Rəy sorğularına görə, Orbanın rəhbərlik etdiyi “Fidesz” partiyası aprelin 12-də keçiriləcək seçkilər ərəfəsində müxalif “Tisza” partiyasından geri qalır. Müxalifətə isə keçmiş hakimiyyət nümayəndəsi Peter Magyar rəhbərlik edir.
Analitiklər hesab edirlər ki, ABŞ-ın açıq siyasi dəstəyi seçkilərin nəticəsinə təsir göstərə bilər. Bununla yanaşı, Macarıstanın Avropa İttifaqı ilə münasibətlərində mövcud gərginlik, xüsusilə Ukrayna məsələsi və Rusiya ilə əlaqələr fonunda daha da diqqət mərkəzinə düşür.
Ekspertlərin fikrincə, bu seçkilər təkcə Macarıstan üçün deyil, həm də Avropada sağ-mühafizəkar siyasi qüvvələrin gələcək mövqeləri baxımından mühüm əhəmiyyət daşıyır.
