ABŞ Silahlı Qüvvələri İranın Hörmüz boğazından keçən kommersiya gəmilərinə hücumlarına cavab olaraq İrana qarşı yeni zərbələr seriyasını başa çatdırdığını açıqlayıb.
MSNews.az xəbər verir ki, bu barədə ABŞ Silahlı Qüvvələrinin Mərkəzi Komandanlığı — CENTCOM məlumat yayıb. Komandanlığın bəyanatına görə, iyulun 7-də yüksək dəqiqlikli sursatlarla İranda 80-dən çox hədəf vurulub. CENTCOM zərbələrin İranın Hörmüz boğazından keçən kommersiya gəmilərinə son hücumlarına “dərhal cavab” olaraq həyata keçirildiyini bildirib.
CENTCOM-un məlumatında vurulan hədəflər arasında İranın hava hücumundan müdafiə sistemləri, komanda-idarəetmə şəbəkələri, sahil radarları, gəmi əleyhinə raket imkanları və İslam İnqilabı Keşikçiləri Korpusuna məxsus 60-dan çox kiçik kater göstərilir. ABŞ tərəfi bu zərbələrin məqsədinin İranın beynəlxalq ticarət dəhlizindən keçən gəmilərə hücumları davam etdirmək imkanlarını zəiflətmək olduğunu bildirib.
ABŞ tərəfinin açıqlamasına əsasən, İran qüvvələri son günlər Hörmüz boğazından keçən üç kommersiya gəmisinə hücum edib. Bunlar Marşall adaları bayrağı altında üzən “Al Rekayyat”, Səudiyyə Ərəbistanı bayrağı altında üzən “Wedyan” və Liberiya bayrağı altında üzən “Cyprus Prosperity” tankerləridir. CENTCOM bu hücumları “əsassız aqressiya”, “atəşkəsin açıq və təhlükəli pozuntusu” və gəmiçilik azadlığına zərbə kimi qiymətləndirib.
İran mediası ABŞ zərbələrindən sonra ölkənin cənubunda partlayışlar baş verdiyini bildirib. “Reuters“-in məlumatına görə, partlayışlar barədə xəbərlər Bəndər-Abbas, Sirik, Qeşm adası və Xarq adası ətrafından gəlib. ABŞ rəsmisi agentliyə bildirib ki, zərbələr hava hücumundan müdafiə sistemləri, sahil müşahidə sistemləri, yer-hava raketləri, gəmi əleyhinə qanadlı raketlər və dron buraxılış məntəqələrini hədəf alıb.
İranın “Xatəm əl-Ənbiya” Mərkəzi Qərargahı ABŞ zərbələrini “açıq təcavüz aktı” adlandırıb və Tehranın Hörmüz boğazının idarəçiliyinə ABŞ müdaxiləsinə imkan verməyəcəyini bildirib. İran tərəfi həmçinin Vaşinqtonu atəşkəs razılaşmasını pozmaqda ittiham edib.
Gərginliyin növbəti mərhələsində SEPAH ABŞ hədəflərinə cavab zərbələri endirdiyini açıqlayıb. “Reuters“-in məlumatına görə, İran İnqilabı Keşikçiləri Korpusu Bəhreyn və Küveytdəki ABŞ hərbi obyektlərinə raket və pilotsuz uçuş aparatları ilə hücum etdiyini bildirib. Hədəflər arasında Bəhreyndəki ABŞ Beşinci Donanması ilə əlaqəli obyektlər, Bəndər-Salman bölgəsi və Küveytdəki Əli əs-Salem aviabazası göstərilib.
“Al Jazeera” isə İranın Bəhreyn və Küveytdə 85 ABŞ hərbi obyektini hədəfə aldığını iddia etdiyini yazıb. Eyni məlumata görə, Bəhreyn və Küveytdə hava həyəcanı siqnalları səsləndirilib. Küveyt ordusu hava hücumundan müdafiə sistemlərinin “düşmən” raket və dron hücumlarına qarşı fəaliyyət göstərdiyini bildirib.
ABŞ zərbələrindən və Hörmüz boğazında təhlükəsizlik risklərinin artmasından sonra neft qiymətləri 3 faizdən çox yüksəlib. Ən azı bir neçə tanker boğazdan keçidi dayandırıb və geri dönüb. Hörmüz boğazı qlobal enerji ticarətinin ən həssas marşrutlarından biri hesab edildiyi üçün hadisələr beynəlxalq bazarlarda da ciddi narahatlıq yaradıb.
Vaşinqton hərbi zərbələrə baxmayaraq İranla danışıqları davam etdirmək niyyətindədir. Reuters də ABŞ rəsmisinə istinadən bildirib ki, danışıqların yekun razılaşmaya doğru “xoş niyyətlə” davam etdirilməsi üzərində iş aparılır. Bununla belə, qarşılıqlı zərbələr son atəşkəs razılaşmasını daha da kövrək vəziyyətə salıb.
