Böyük Britaniya dron və yüksək sürətli raketlərə qarşı mübarizə məqsədilə yeni lazer silahlarının hazırlanmasına 20 milyon funt sterlinq ayıracaq. Bu qərar NATO-nun Rusiya ilə mümkün münaqişəyə hazırlığını artırmalı olduğu barədə xəbərdarlıqlar fonunda verilib.
Böyük Britaniyanın Müdafiə Nazirliyi bazar ertəsi bildirib ki, yeni sistemlər 2027-ci ildən etibarən Kral Donanmasının esmineslərinə quraşdırılacaq “DragonFire” lazer sistemlərini tamamlayacaq.
Rəsmi olaraq “yönləndirilmiş enerji silahları” adlandırılan lazer texnologiyaları dron və raketləri məhv etmək üçün bahalı raket sistemlərinə daha ucuz alternativ kimi qiymətləndirilir.
Atış başına cəmi 10 funt sterlinqə başa gələn DragonFire sistemi yüksək sürətli raket və dronları vurmaq gücünə malikdir. Sistem bir mildən (təxminən 1,6 km) artıq məsafədən 1 funtluq sikkəni dəqiqliklə vurmaq qabiliyyətinə sahibdir.
Bununla yanaşı, hərbi rəhbərlik lazerlərin zirehli quru texnikalarından da istifadə edilə biləcək variantlarını araşdırır.
20 milyon funtluq lazer proqramı UK Defence Innovation (UKDI) qurumu çərçivəsində dronlara qarşı silah sistemləri üçün ayrılmış 30 milyon funtluq ümumi fondun tərkib hissəsidir. UKDI qabaqcıl hərbi texnologiyalara sərmayə yatırmaq məqsədilə yaradılmış yeni dövlət qurumudur.
Bundan əlavə, 112 milyon funt dron texnologiyalarına ayrılıb. 25 milyon funt Kral Donanmasının avtonom “Excalibur” sualtı aparatına, 7,5 milyon funt isə pilotsuz “Proteus” helikopterinə yönəldilib.
UKDI bildirib ki, təhlükəsizlik səbəbilə bütün şirkətlərin adları açıqlanmır, lakin layihə 20 kiçik və orta Britaniya şirkətini, 11 mikro-biznesi və 2 akademik qurumu əhatə edir.
Böyük Britaniyanın müdafiə naziri Con Hili açıqlamasında bildirib:
“İllərlə davam edən zəif maliyyələşmədən sonra Böyük Britaniya Silahlı Qüvvələrini və yerli biznesi müdafiə innovasiyalarının ön sırasına çıxarmaqda qərarlıyam.
Strateji Müdafiə İcmalı açıq şəkildə göstərdi ki, Ukrayna müharibəsindən dərs çıxarmalıyıq. Məhz, buna görə dron və dronlara qarşı sistemlərə yatırımı sürətləndiririk.”
Nazir əlavə edib ki, Rusiyanın Ukraynada mülki əhalini bombardman etməsi və Avropada “boz zona” xarakterli dron müdaxilələri bu addımın nə qədər təcili olduğunu göstərir.
UKDI-nin yaradılması hökumətin müdafiə innovasiyalarına dair xərcləri vahid mərkəzdən idarə etmək cəhdinin bir hissəsidir. Qurumun illik 400 milyon funtluq qorunan büdcəsi var və dronlar, lazerlər, kvant texnologiyaları kimi sahələrə yönələcək.
Strateji Müdafiə İcmalına əsasən, gəmi və tanklar üçün müqavilə müddəti 6 ildən 2 ilə, rabitə və silah modernizasiyası 3 ildən 1 ilə, sürətli prototiplər üçün isə 3 ay ərzində müqavilə imzalanması hədəflənir.
Ekspertlər hesab edirlər ki, bu addımlar Ukrayna müharibəsinin sürətlə dəyişən döyüş reallıqlarına uyğunlaşmaq üçün atılmış strateji addımdır.
