Ukraynada səfərbərlik böhranı dərinləşir. “The New York Times” yazır ki, xüsusilə ölkənin cənub-qərbində, Dunay çayı sahilində yerləşən Vılkove şəhərində səfərbərlik yaşlı kişilərin böyük hissəsi ya ölkəni tərk etməyə çalışıb, ya da evlərində gizlənir.
Məlumata görə, 25-60 yaş arası kişilərin bir çoxu səfərbərlikdən yayınmaq üçün ya Rumıniyaya keçməyə çalışıb, ya da evdən çıxmamaqla “gizli həyat” yaşayır. Şəhərin coğrafi mövqeyi — çaylar, bataqlıqlar və sərhəd-keçid məntəqələri ilə əhatələnməsi — qaçışı həm cəlbedici, həm də çox təhlükəli edir. Bəzi kişilər özlərini çayın axınına təslim edərək ölüblər.
Şəhərin meri Matviy İvanovun sözlərinə görə, müharibədən əvvəl Vılkovede təxminən 8 min sakin var idi, hazırda isə cəmi 5 min nəfər qalıb və onların əksəriyyəti qadınlar və yaşlılardır. “Bələdiyyədə işləyən tək kişi mənəm”, – deyə o bildirir.
Kişilərin yoxluğunda şəhərdə əvvəl kişilərə aid sayılan sahələri indi qadınlar icra edir. Xüsusilə balıqçılıqda — əvvəllər kişilərin dominant olduğu sahədə — artıq yüzlərlə qadın çalışır. Qadınların bir hissəsi bunu yeni imkan və azadlıq kimi dəyərləndirsə də, digərləri ağır fiziki iş yükündən şikayət edir.
Ekspertlərin fikrincə, bölgədə milli kimlik tarixi olaraq zəif formalaşdığından və hakimiyyətə etimad aşağı olduğundan, müharibəyə dəstək ölkənin digər hissələrinə nisbətən daha zəifdir.
Ukrayna Baş Prokurorluğunun məlumatına görə, ölkə üzrə artıq 290 min nəfər səfərbərlikdən yayınma və ya ordudan qaçma ilə bağlı araşdırılır.
